मुक्ताईनगर-लाईव्ह ट्रेंड्स न्यूज प्रतिनिधी । मुक्ताईनगर तालुक्यात १ जून रोजी झालेल्या अवकाळी पाऊस, वादळी वारे आणि गारपिटीमुळे शेतकऱ्यांचे मोठ्या प्रमाणावर नुकसान झाले असून नुकसानग्रस्तांना तातडीने मदत देण्यात यावी, अशी मागणी तहसीलदारांकडे निवेदनाद्वारे करण्यात आली आहे.
अंतुरलीसह तालुक्यातील अनेक गावांमध्ये झालेल्या या नैसर्गिक आपत्तीमुळे केळी, कापूस, मका, ज्वारी, भाजीपाला तसेच विविध फळबागांचे मोठे नुकसान झाले आहे. अनेक ठिकाणी उभ्या पिकांची अक्षरशः नासधूस झाली असून शेतकऱ्यांसमोर आर्थिक संकट उभे ठाकले आहे. याशिवाय अनेक घरांची पत्रे उडून गेली असून जनावरांच्या गोठ्यांचेही नुकसान झाले आहे.
या पार्श्वभूमीवर शासनाने महसूल, कृषी व ग्रामपंचायत विभागाच्या संयुक्त पथकांमार्फत नुकसानग्रस्त भागांचे तातडीने पंचनामे करावेत, कोणताही शेतकरी मदतीपासून वंचित राहू नये याची दक्षता घ्यावी तसेच पंचनामे पारदर्शक पद्धतीने करण्यात यावेत, अशी मागणी निवेदनातून करण्यात आली आहे.
तसेच पीक विमा योजनेअंतर्गत संबंधित विमा कंपन्यांना त्वरित सूचना देऊन भरपाई प्रक्रिया सुरू करावी, शेतकऱ्यांच्या खात्यात शासकीय मदत लवकरात लवकर जमा करावी तसेच घरांची व गोठ्यांची पडझड झालेल्या कुटुंबांनाही स्वतंत्र आर्थिक सहाय्य देण्यात यावे, अशी मागणी करण्यात आली.
नुकसानग्रस्त शेतकरी आणि नागरिकांवर ओढावलेल्या या संकटाची दखल घेऊन प्रशासनाने तात्काळ कार्यवाही करावी व प्रभावित कुटुंबांना दिलासा द्यावा, अशी अपेक्षा व्यक्त करण्यात आली आहे.
यावेळी ॲड. राहुल अशोक पाटील, विधानसभा क्षेत्रप्रमुख नितीन बळीराम गोसावी, ॲड. अशोक बोडदे, ॲड. देवेंद्र बोडदे, ॲड. राहुल लहासे यांच्यासह अनेक कार्यकर्ते उपस्थित होते. शेतकरी बांधवांना न्याय मिळवून देण्यासाठी प्रशासनाने तातडीने पावले उचलावीत, अशी जोरदार मागणी यावेळी करण्यात आली.
ठळक मुद्दे
- अवकाळी पाऊस, वादळी वारे व गारपिटीमुळे मोठे नुकसान
- केळी, कापूस, मका, ज्वारी व भाजीपाला पिकांचे नुकसान
- घरांची पत्रे उडाली, गोठ्यांचेही नुकसान
- संयुक्त पथकांमार्फत तातडीने पंचनाम्यांची मागणी
- पीक विमा व शासकीय मदत तत्काळ देण्याची मागणी
- नुकसानग्रस्त कुटुंबांना स्वतंत्र आर्थिक सहाय्य देण्याची अपेक्षा
