यावल-लाईव्ह ट्रेंड्स न्यूज प्रतिनिधी । फैजपूर पोलीस ठाण्यात कार्यरत असलेले वरिष्ठ पोलीस उपनिरीक्षक देविदास विष्णू सूरदास हे तब्बल ३४ वर्षांच्या प्रदीर्घ आणि उल्लेखनीय प्रशासकीय सेवेनंतर ३१ मे रोजी सेवाविवृत्त झाले. त्यांच्या सेवापूर्ती निमित्त फैजपूर पोलीस स्टेशन परिसरात आयोजित कार्यक्रमात त्यांना भावपूर्ण निरोप देण्यात आला. या प्रसंगी सहकारी पोलीस अधिकारी, कर्मचारी, मित्रपरिवार आणि कुटुंबीय मोठ्या संख्येने उपस्थित होते.
रावेर तालुक्यातील मुंजलवाडी येथील रहिवासी असलेले देविदास विष्णू सूरदास यांनी सन १९९३ मध्ये महाराष्ट्र पोलीस दलात प्रवेश केला. सुरुवातीपासूनच कर्तव्यनिष्ठा, शिस्त आणि प्रामाणिक कामाच्या बळावर त्यांनी पोलीस दलात वेगळी ओळख निर्माण केली. आपल्या सेवाकाळात त्यांनी भुसावळ बाजारपेठ पोलीस स्टेशन, मुक्ताईनगर, जिल्हा पेठ, एमआयडीसी जळगाव तसेच फैजपूर पोलीस मुख्यालय अशा विविध ठिकाणी उत्कृष्ट प्रशासकीय सेवा बजावत नागरिकांचा विश्वास संपादन केला.
पोलीस दलातील जबाबदाऱ्या सांभाळताना त्यांनी कायदा व सुव्यवस्था राखण्याबरोबरच नागरिकांशी संवाद आणि संवेदनशीलतेने काम करण्यावर भर दिला. त्यांच्या शांत, संयमी आणि अभ्यासू स्वभावामुळे सहकाऱ्यांमध्येही त्यांना विशेष मान होता. अनेक महत्त्वाच्या प्रशासकीय जबाबदाऱ्या त्यांनी यशस्वीपणे पार पाडत पोलीस विभागात आपल्या कामाचा वेगळा ठसा उमटवला.
फैजपूर येथे झालेल्या सेवाविवृत्ती कार्यक्रमाला फैजपूर विभागाचे विभागीय पोलीस अधिकारी अनिल बडगुजर प्रमुख उपस्थित होते. त्यांच्या हस्ते देविदास सूरदास यांचा सत्कार करण्यात आला. यावेळी सहकारी अधिकारी आणि कर्मचाऱ्यांनी सूरदास यांच्या सेवाकाळातील आठवणींना उजाळा देत त्यांच्या कामाचे कौतुक केले. त्यांच्या कार्यपद्धतीतून अनेकांना प्रेरणा मिळाल्याच्या भावना यावेळी व्यक्त करण्यात आल्या.
सेवाविवृत्तीनंतर भावना व्यक्त करताना देविदास सूरदास यांनी पोलीस दलातील ३४ वर्षांचा प्रवास समाधान देणारा ठरल्याचे सांगितले. वरिष्ठांचे मार्गदर्शन, सहकाऱ्यांचे सहकार्य आणि नागरिकांचा विश्वास यामुळे आपल्याला जबाबदाऱ्या यशस्वीपणे पार पाडता आल्या, असे त्यांनी नमूद केले. पोलीस दलातील अनुभव हा आयुष्यभरासाठी अमूल्य ठेवा असल्याचेही त्यांनी सांगितले.
