जळगाव-लाईव्ह ट्रेंड्स न्यूज प्रतिनिधी । गोदावरी फाउंडेशन संचलित गोदावरी कॉलेज ऑफ इंजिनिअरिंग, जळगाव येथील इलेक्ट्रॉनिक्स अँड टेलिकम्युनिकेशन अभियांत्रिकी विभागातील विद्यार्थ्यांनी जैन व्हॅली येथील जैन फार्म फ्रेश फूड लिमिटेड तसेच जैन हिल येथील गांधी तीर्थ येथे औद्योगिक व शैक्षणिक भेट दिली. या भेटीद्वारे विद्यार्थ्यांना आधुनिक औद्योगिक प्रक्रिया, तंत्रज्ञानाचा वापर तसेच महात्मा गांधी यांच्या विचारांची प्रत्यक्ष माहिती मिळाली.
विद्यार्थ्यांना अभियांत्रिकी शिक्षणातील सैद्धांतिक ज्ञानाचा प्रत्यक्ष औद्योगिक क्षेत्राशी संबंध जोडता यावा, तसेच उद्योगांमध्ये वापरल्या जाणाऱ्या आधुनिक तंत्रज्ञानाची माहिती मिळावी, या उद्देशाने या शैक्षणिक भेटीचे आयोजन करण्यात आले होते. या भेटीदरम्यान विद्यार्थ्यांनी उद्योगातील विविध प्रक्रिया जवळून समजून घेतल्या. जैन फार्म फ्रेश फूड लिमिटेड येथे विद्यार्थ्यांनी केळी, आंबा आणि मसाले प्रक्रिया करणाऱ्या प्लांटला भेट दिली. कृषी उत्पादनांवर केली जाणारी प्रक्रिया, गुणवत्ता नियंत्रण, पॅकेजिंग आणि उत्पादन व्यवस्थापन याबाबत विद्यार्थ्यांना प्रत्यक्ष माहिती देण्यात आली. उत्पादन प्रक्रियेत आधुनिक यंत्रसामग्रीचा वापर कशा पद्धतीने केला जातो, याचेही त्यांनी निरीक्षण केले.
इलेक्ट्रॉनिक्स अँड टेलिकम्युनिकेशन अभियांत्रिकीच्या विद्यार्थ्यांसाठी या भेटीचे विशेष महत्त्व ठरले. उद्योगांमध्ये सेन्सर्स, ऑटोमेशन, कंट्रोल सिस्टम आणि इलेक्ट्रॉनिक नियंत्रण प्रणालींचा वापर करून विविध प्रक्रिया कशा नियंत्रित केल्या जातात, याची प्रत्यक्ष माहिती विद्यार्थ्यांना मिळाली. त्यामुळे त्यांच्या अभ्यासक्रमातील तांत्रिक संकल्पना आणि प्रत्यक्ष औद्योगिक कार्यपद्धती यातील संबंध अधिक स्पष्ट झाला. यानंतर विद्यार्थ्यांनी जैन हिल येथील गांधी तीर्थला भेट दिली. येथे महात्मा गांधी यांच्या जीवनकार्याची, स्वातंत्र्य चळवळीतील योगदानाची तसेच त्यांच्या विचारांची माहिती विद्यार्थ्यांनी जाणून घेतली. सत्य, अहिंसा, स्वावलंबन, सामाजिक समता आणि राष्ट्रसेवा या गांधी विचारांचे महत्त्व विद्यार्थ्यांना समजावून सांगण्यात आले.
या शैक्षणिक भेटीमुळे विद्यार्थ्यांना केवळ तांत्रिक ज्ञानच नव्हे, तर सामाजिक मूल्ये आणि जबाबदारीची जाणीवही झाली. वर्गामध्ये शिकविल्या जाणाऱ्या संकल्पनांचा प्रत्यक्ष अनुभव मिळाल्याने विद्यार्थ्यांचे तांत्रिक आकलन, निरीक्षण क्षमता आणि व्यावसायिक कौशल्यांना चालना मिळाली. औद्योगिक क्षेत्रातील प्रत्यक्ष कामकाज समजून घेण्यासोबतच भविष्यातील अभियांत्रिकी कारकिर्दीसाठी आवश्यक दृष्टिकोन विकसित करण्यास या भेटीचा उपयोग झाला. या भेटीदरम्यान विभागाचे प्रा. डॉ. ईश्वर जाधव, प्रा. डॉ. देवेंद्र मराठे, प्रा. राजेंद्र पाटील तसेच प्रयोगशाळा सहाय्यक निर्भय नेमाडे उपस्थित होते. त्यांच्या मार्गदर्शनाखाली विद्यार्थ्यांनी विविध औद्योगिक प्रक्रिया आणि गांधी तीर्थमधील माहिती जाणून घेतली.
