जळगाव-लाईव्ह ट्रेंडस न्यूज प्रतिनिधी | केंद्रीय क्रीडा व युवक कल्याण राज्यमंत्री ना. रक्षाताई खडसे यांनी परधाडे येथील रेल्वे अपघातात जखमी झालेल्यांची डॉ. उल्हास पाटील मेडिकल कॉलेज व धर्मार्थ रूग्णालयात जाऊन आस्थेवाईकपणे विचारपूस केली.
केंद्रीय क्रीडा व युवक कल्याण राज्यमंत्री रक्षा खडसे यांनी काल झालेल्या रेल्वे दुर्घटनेतील जखमींची डॉ. उल्हास पाटील मेडिकल कॉलेजच्या हॉस्पिटल येथे भेट घेऊन आस्थेने चौकशी केली. त्यांनी जखमींच्या नातेवाईकांना भेटून दिलासा देत, “काळजी करू नका, शासनाकडून सर्व प्रकारची मदत केली जात आहे. जखमी लवकरच बरे होतील,” असे सांगून त्यांच्याबद्दल सदिच्छा व्यक्त केल्या.
यावेळी जिल्हाधिकारी आयुष प्रसाद, गोदावरी फाउंडेशनच्या संचालिका केतकीताई पाटील, तहसीलदार नीता लबडे, सह-जिल्हा शल्यचिकित्सक आकाश चौधरी, कॉलेजचे अधिष्ठाता डॉक्टर प्रशांत सोळंके, रजिस्ट्रार प्रमोद भिरूड तसेच गोदावरी हॉस्पिटलचे डॉक्टर आणि पदाधिकारी उपस्थित होते.
पारधंदे येथे झालेल्या दुर्घटनेत जखमी झालेल्यांवर पाचोरा येथे उपचार करण्यात आले होते. त्यानंतर सर्व नऊ जखमींना गोदावरी हॉस्पिटलमध्ये हलवण्यात आले. जखमींच्या आरोग्याची संपूर्ण काळजी घेत असल्याचे डॉ. केतकी पाटील यांनी केंद्रीय राज्यमंत्री रक्षा खडसे यांना सांगितले.
जिल्हाधिकारी आयुष प्रसाद यांनीही मंत्री महोदयांना रेल्वे दुर्घटनेबाबत सविस्तर माहिती दिली. यावेळी श्रीमती खडसे यांनी या दुर्दैवी घटनेबद्दल दुःख व्यक्त करत, मृतांच्या कुटुंबीयांप्रती सहवेदना व्यक्त केल्या.
