जळगाव-लाईव्ह ट्रेंड्स न्यूज प्रतिनिधी । गोदावरी फाउंडेशन संचलित गोदावरी इंग्लिश स्कूलमध्ये दिवाळीचा सण मोठ्या उत्साहात आणि आनंदी वातावरणात साजरा करण्यात आला. यानिमित्त शाळेत विविध उपक्रमांचे आयोजन करण्यात आले होते. विद्यार्थ्यांनी पारंपरिक वेशभूषा परिधान करून तसेच रंगीबेरंगी सजावट आणि पणत्यांच्या प्रकाशात दिवाळीचा मनमुराद आनंद लुटला. यावेळी प्रदूषणमुक्त आणि पर्यावरणपूरक दिवाळी साजरी करण्याचा संदेशही देण्यात आला.
दिवाळी हा आनंद, उत्साह, प्रकाश आणि आपुलकीचा सण आहे. या सणाचे सांस्कृतिक आणि सामाजिक महत्त्व विद्यार्थ्यांना समजावे, या उद्देशाने शाळेत दिवाळी उत्सवाचे आयोजन करण्यात आले होते. या उपक्रमात शाळेतील चिमुकल्यांनी उत्स्फूर्त सहभाग नोंदवला. विद्यार्थ्यांच्या पारंपरिक वेशभूषेमुळे आणि त्यांच्या उत्साहामुळे शाळेचे वातावरण अधिकच आनंदमय झाले होते. शाळेच्या परिसरात करण्यात आलेली आकर्षक रंगीबेरंगी सजावट, पणत्यांची आरास आणि दिवाळीचे वातावरण यामुळे संपूर्ण शाळा प्रकाशमय झाली होती. विद्यार्थ्यांना दिवाळीच्या परंपरा, सणामागील सांस्कृतिक महत्त्व आणि आनंद वाटून घेण्याची भावना याविषयी माहिती देण्यात आली. याप्रसंगी शाळेच्या प्राचार्य नीलिमा चौधरी उपस्थित होत्या. त्यांनी विद्यार्थ्यांना दिवाळीच्या शुभेच्छा देत पर्यावरण संवर्धनाचा महत्त्वपूर्ण संदेश दिला. दिवाळी साजरी करताना फटाक्यांमुळे होणारे वायुप्रदूषण आणि ध्वनिप्रदूषण टाळणे आवश्यक आहे. त्यामुळे सर्वांनी प्रदूषणमुक्त आणि पर्यावरणपूरक दिवाळी साजरी करावी, असे आवाहन त्यांनी केले.
दिवाळीच्या आनंदात निसर्गाचे संरक्षण करण्याबरोबरच इतरांच्या आरोग्याची काळजी घेणेही तितकेच महत्त्वाचे आहे. फटाक्यांच्या आवाजामुळे लहान मुले, ज्येष्ठ नागरिक तसेच पशुपक्ष्यांना त्रास होतो. त्यामुळे पर्यावरणाची हानी न करता आनंदाने सण साजरा करण्याची सवय विद्यार्थ्यांनी लावून घ्यावी, असेही त्यांनी सांगितले.शाळेत आयोजित या दिवाळी उत्सवामुळे विद्यार्थ्यांमध्ये सणाविषयी उत्साह निर्माण झाला. त्याचबरोबर पर्यावरण संरक्षण, सामाजिक जबाबदारी आणि आनंद वाटून घेण्याची भावना रुजविण्यास मदत झाली. अशा उपक्रमांतून विद्यार्थ्यांना शिक्षणासोबतच संस्कार आणि पर्यावरण संवर्धनाचे महत्त्व शिकण्याची संधी मिळाली.
