जळगाव-लाईव्ह ट्रेंड्स न्यूज प्रतिनिधी । पाचोरा तालुक्यातील विविध शासकीय विभागांच्या कामकाजाचा सर्वंकष आढावा घेण्यासाठी जिल्हाधिकारी रोहन घुगे यांच्या अध्यक्षतेखाली महत्त्वपूर्ण बैठक आयोजित करण्यात आली. या बैठकीत तालुकास्तरीय सर्व विभागांच्या कामकाजाची सविस्तर समीक्षा करण्यात आली असून प्रलंबित प्रश्न तातडीने मार्गी लावण्याचे निर्देश संबंधित विभागांना देण्यात आले. नागरिकांना अधिक प्रभावी आणि वेळेवर सेवा देण्यासाठी विभागीय समन्वय वाढविण्यावरही भर देण्यात आला.
बैठकीत प्रशासकीय कामकाज, उपलब्ध मनुष्यबळ, कार्यालयीन इमारतींची स्थिती, वाहन व्यवस्थापन, मूलभूत सुविधा, कृषी नियोजन, पूरनियोजन, पाणीपुरवठा व्यवस्था तसेच नवीन शैक्षणिक वर्षाच्या तयारीसह विविध महत्त्वाच्या विषयांवर सखोल चर्चा करण्यात आली. प्रत्येक विभागाकडून कामकाजाचा आढावा घेताना येणाऱ्या अडचणी व समस्यांची माहिती जिल्हाधिकाऱ्यांनी जाणून घेतली.
जिल्हाधिकारी रोहन घुगे यांनी विभागप्रमुखांना आवश्यकतेनुसार प्रशासकीय कार्यवाही करण्याचे, उपलब्ध संसाधनांचा परिणामकारक वापर करण्याचे तसेच अपूर्ण व प्रलंबित कामांना गती देण्याचे निर्देश दिले. याशिवाय कार्यालयीन इमारतींची दुरुस्ती, आवश्यक देखभाल, विविध योजनांची प्रभावी अंमलबजावणी आणि नागरिकाभिमुख सेवा वेळेत उपलब्ध करून देण्यावर विशेष भर देण्यात आला. सध्या वाढत्या तापमानाचा विचार करता नागरिकांना आवश्यक सुविधा उपलब्ध करून देण्यासाठी उपाययोजना राबविण्याच्या सूचना करण्यात आल्या. शेतकऱ्यांना आवश्यक मदत वेळेत उपलब्ध करून देणे, आगामी पावसाळ्याच्या पार्श्वभूमीवर पूरनियोजन अधिक सक्षम करणे आणि संभाव्य पूरग्रस्त भागांसाठी आवश्यक उपाययोजनांना गती देण्याचे निर्देशही जिल्हाधिकाऱ्यांनी दिले. तसेच सुरू असलेल्या विकासकामांचा नियमित आढावा घेऊन ती वेळेत पूर्ण करण्याबाबत संबंधित विभागांना सूचना देण्यात आल्या.
शिक्षण विभागाच्या कामकाजाचा आढावा घेताना नवीन शैक्षणिक वर्षासाठी शाळांमध्ये आवश्यक सुविधा वेळेत उपलब्ध व्हाव्यात यावर भर देण्यात आला. विद्यार्थ्यांच्या गुणवत्तावाढीसाठी नियोजनबद्ध उपक्रम राबविणे, शैक्षणिक वातावरण अधिक सक्षम करणे आणि शाळांमधील मूलभूत गरजांची पूर्तता करण्याबाबतही मार्गदर्शन करण्यात आले. नागरिकांच्या तक्रारी आणि सूचना थेट प्रशासनापर्यंत पोहोचण्यासाठी जनसंवाद उपक्रम अधिक प्रभावी करण्यावरही बैठकीत चर्चा झाली. यासाठी क्यूआर कोड प्रणालीचा वापर करण्याचे आवाहन करण्यात आले. प्राप्त तक्रारींवर पंधरा दिवसांच्या आत स्मरणपत्र प्रणालीद्वारे कार्यवाही केली जाणार असल्याची माहिती यावेळी देण्यात आली. यामुळे नागरिकांच्या समस्या जलद गतीने सोडविण्यास मदत होणार असल्याचे प्रशासनाचे मत आहे.
