बर्मिंगहॅम -वृत्तसेवा । वुमन्स टी-20 वर्ल्डकप 2026 स्पर्धेत भारत आणि पाकिस्तान यांच्यातील बहुप्रतिक्षित सामन्याकडे क्रिकेट चाहत्यांचे लक्ष लागले आहे. या सामन्यात भारतीय संघाची स्टार अष्टपैलू खेळाडू दीप्ती शर्मा हिच्याकडे एक मोठा विक्रम आपल्या नावावर करण्याची सुवर्णसंधी आहे. पाकिस्तानविरुद्धच्या सामन्यात दमदार गोलंदाजी करताच दीप्ती टी-20 आंतरराष्ट्रीय क्रिकेटमध्ये नवा इतिहास घडवू शकते.
भारत आणि पाकिस्तान यांच्यातील सामना नेहमीच रोमांचक मानला जातो. वुमन्स टी-20 वर्ल्डकप 2026 मध्ये भारतीय संघ आपल्या मोहिमेची सुरुवात पारंपरिक प्रतिस्पर्धी पाकिस्तानविरुद्ध करणार आहे. या सामन्यात भारतीय संघाच्या विजयासाठी दीप्ती शर्माची भूमिका अत्यंत महत्त्वाची ठरणार आहे. भारत-पाकिस्तान महिला टी-20 सामन्यांमध्ये सर्वाधिक विकेट घेण्याचा विक्रम सध्या भारताच्या एकता बिष्ट आणि पाकिस्तानच्या निदा डार यांच्या नावावर आहे. या दोघांनीही पाकिस्तानविरुद्धच्या टी-20 सामन्यांमध्ये प्रत्येकी 10 विकेट घेतल्या आहेत. आता दीप्ती शर्माला या विक्रमाशी बरोबरी करण्याची आणि त्यानंतर विक्रम मोडण्याची संधी आहे.
दीप्ती शर्माने आतापर्यंत पाकिस्तानविरुद्ध टी-20 आंतरराष्ट्रीय सामन्यांमध्ये 9 विकेट घेतल्या आहेत. तर पाकिस्तानची माजी क्रिकेटपटू सना मीर हिच्याही नावावर 9 विकेट आहेत. मात्र सना मीरने आंतरराष्ट्रीय क्रिकेटमधून निवृत्ती घेतल्याने दीप्तीला पुढे जाण्याची संधी मिळाली आहे. भारत आणि पाकिस्तान यांच्यात झालेल्या सात टी-20 आंतरराष्ट्रीय सामन्यांमध्ये दीप्ती शर्माने प्रभावी गोलंदाजी करत 9 फलंदाजांना बाद केले आहे. तिच्या फिरकी गोलंदाजीवर भारतीय संघाला अनेक वेळा महत्त्वाच्या सामन्यांमध्ये यश मिळाले आहे.
वुमन्स टी-20 वर्ल्डकप 2026 मधील पाकिस्तानविरुद्धच्या सामन्यात दीप्ती शर्माने आणखी दोन विकेट घेतल्या तर तिच्या नावावर मोठा विक्रम जमा होईल. पाकिस्तानविरुद्ध टी-20 आंतरराष्ट्रीय क्रिकेटमध्ये सर्वाधिक विकेट घेणारी गोलंदाज होण्याचा मान तिला मिळेल. दीप्ती शर्मा ही केवळ गोलंदाज म्हणून नव्हे तर अष्टपैलू खेळाडू म्हणून भारतीय संघासाठी महत्त्वाची आहे. फलंदाजी आणि गोलंदाजी या दोन्ही विभागांमध्ये ती सातत्यपूर्ण कामगिरी करत असून, आगामी सामन्यात तिच्या कामगिरीवर सर्वांचे लक्ष असणार आहे.
