वरणगाव लाईव्ह ट्रेंडस न्यूज प्रतिनिधी । भुसावळ तालुक्यातील तपतकठोरा येथील ३२ वर्षीय दिनकर सुभाष तायडे यांचा मृतदेह १६ मार्च रोजी लुमखेडा शिवारातील तापी नदीच्या पुलाखाली आढळून आला होता. याप्रकरणी सावदा पोलीस ठाण्यात नोंद करण्यात आली होती. मात्र, आता या घटनेला वेगळे वळण मिळाले आहे. दिनकर तायडे यांचे वडील सुभाष तायडे यांनी पोलीस अधीक्षक यांच्याकडे तक्रार दाखल करत, हा आत्महत्येचा प्रकार नसून अज्ञात व्यक्तीने खून केल्याचा आरोप केला आहे.
सुभाष तायडे यांनी आपल्या तक्रारीत म्हटले आहे की, त्यांचा मुलगा दिनकर याने आत्महत्या केली नसून त्याचा खून झाला आहे. त्यांनी मृतदेहाची अवस्था आणि घटनास्थळावर आढळलेल्या परिस्थितीचा हवाला देत अनेक प्रश्न उपस्थित केले आहेत. त्यांच्या म्हणण्यानुसार, ज्या दगडावर मृतदेह सापडला, त्यावर रक्ताचे कोणतेही डाग नव्हते. तसेच, पोलिसांनी घटनास्थळाची फोटोग्राफी न करता आणि नातेवाईकांना घटनास्थळी न बोलावता घाईघाईत मृतदेह उचलला, असा आरोप त्यांनी केला आहे.
सुभाष तायडे यांनी आपल्या निवेदनात स्पष्टपणे म्हटले आहे की, त्यांच्या मुलाचा खून करून त्याचा मृतदेह नदीपात्रात ठेवण्यात आला आहे. त्यांनी सावदा पोलिसांवर या प्रकरणाकडे दुर्लक्ष केल्याचा आणि तपासात हलगर्जीपणा केल्याचा गंभीर आरोप केला आहे. वडिलांच्या या तक्रारीमुळे १६ मार्चच्या घटनेतील गूढ वाढले असून, पोलीस आता या आरोपांची आणि नवीन तथ्यांची कसून चौकशी करण्याची शक्यता आहे. या घटनेमुळे तपत कठोरा परिसरात शोक आणि संशयाचे वातावरण निर्माण झाले आहे.
