यावल-लाईव्ह ट्रेंड्स न्यूज प्रतिनिधी । यावल परिसरातील बऱ्हाणपूर-अंकलेश्वर महामार्गावर किनगाव जवळील लव्हाळ नाल्यावरील पुलामुळे नागरिक आणि वाहनधारक चिंता व्यक्त करत आहेत. हा जुना पुल महिन्यांपूर्वी काही कठडे बसवण्यात आले तरी, पुलाच्या उत्तर आणि दक्षिण बाजूला आठ ते दहा फूटाची रिकामी जागा अजूनही राहिली आहे, जी मोठ्या प्रमाणावर धोकादायक आहे.
लव्हाळ नाल्याची खोली सुमारे ४० ते ५० फूट असून, पावसाळ्यात या नाल्यावर पाणी साचते. यामुळे पुलावरून वाहन चालवताना अत्यंत सावधगिरी बाळगणे आवश्यक आहे. पुलावरील रिकामी जागा आणि त्यातील मोठे खड्डे अपघातासाठी धोकादायक आहेत.
बऱ्हाणपूर-अंकलेश्वर महामार्ग हा दिवस-रात्र लहान, मोठ्या तसेच अवजड वाहनांनी भरलेला असतो. त्यामुळे रिकामी जागा आणि खड्ड्यांमुळे मोठा अपघात होण्याची शक्यता प्रचंड वाढते. स्थानिक वाहनधारक आणि किनगाव परिसरातील नागरिक यावल सार्वजनिक बांधकाम विभागाला तात्काळ कठडे बसवून पुल सुरक्षित करण्याची मागणी करत आहेत.
पावसाळ्यापूर्वी पुलावर पाणी बाहेर जाण्याचा मार्ग मोकळा करणे अत्यावश्यक असल्याचे स्थानिकांनी सांगितले. यामुळे वाहतूक सुरळीत होईल आणि अपघात टाळता येतील. यावल सार्वजनिक बांधकाम विभागाने या मुदतीवर त्वरीत लक्ष देणे गरजेचे आहे, असे नागरिकांचे मत आहे.
