यावल-लाईव्ह ट्रेंड्स न्यूज प्रतिनिधी । यावल नगरपालिका क्षेत्रात जनगणना 2027 च्या पहिल्या टप्प्याला सुरुवात झाली असून या महत्त्वपूर्ण मोहिमेसाठी नगरपालिका प्रशासन पूर्णपणे सज्ज झाले आहे. शहरातील नागरिकांकडून अचूक माहिती संकलित करून भविष्यातील विकास आराखड्याला दिशा देण्यासाठी ही जनगणना प्रक्रिया महत्त्वाची मानली जात आहे. यावल नगरपालिकेच्या वतीने नागरिकांनी प्रगणकांना आवश्यक माहिती देऊन प्रशासनाला सहकार्य करावे, असे आवाहन करण्यात आले आहे.
नगरपालिकेचे मुख्याधिकारी निशिकांत गवई यांच्या मार्गदर्शनाखाली जनगणना पथकाने शहरात प्रत्यक्ष कामास सुरुवात केली आहे. 16 मे 2026 पासून सुरू झालेली ही मोहीम 14 जून 2026 पर्यंत राबविण्यात येणार आहे. या कालावधीत नियुक्त करण्यात आलेले प्रगणक नागरिकांच्या घरी जाऊन विविध प्रकारची माहिती संकलित करणार आहेत. नागरिकांनी आपल्या कुटुंबासंबंधी आवश्यक माहिती योग्य प्रकारे उपलब्ध करून द्यावी, असे प्रशासनाने स्पष्ट केले आहे.
जनगणना प्रक्रियेदरम्यान काही वेळा घर बंद असल्यामुळे माहिती नोंदविण्यात अडचणी येत असल्याचे प्रशासनाच्या निदर्शनास आले आहे. त्यामुळे काही नागरिकांकडून “प्रगणक आमच्या घरी आले नाहीत” अशा तक्रारी देखील केल्या जातात. यासंदर्भात कोणाची जनगणना राहिल्यास किंवा नजरचुकीने नोंद झाली नसल्यास संबंधित नागरिकांनी नगरपालिकेत प्रत्यक्ष संपर्क साधून आपली जनगणना करून घ्यावी, असे आवाहन यावल नगरपालिकेच्या लोकनियुक्त नगराध्यक्ष सौ. छायाताई अतुल पाटील आणि मुख्याधिकारी निशिकांत गवई यांनी केले आहे.
नगराध्यक्ष सौ. छायाताई अतुल पाटील यांनी नागरिकांना उद्देशून सांगितले की, जनगणना ही केवळ सरकारी प्रक्रिया नसून देशाच्या भविष्यासाठी महत्त्वाचा आधार आहे. लोकसंख्येची अचूक माहिती मिळाल्यास शासनाला विविध विकास योजना प्रभावीपणे राबविणे शक्य होते. त्यामुळे प्रत्येक नागरिकाने जबाबदारीची जाणीव ठेवून या मोहिमेत सक्रिय सहभाग नोंदवावा आणि प्रगणकांना आवश्यक माहिती देऊन सहकार्य करावे, असे त्यांनी आवाहन केले.
