जळगाव-लाईव्ह ट्रेंड्स न्यूज प्रतिनिधी । जळगाव-बांभोरी मार्गावरील शासकीय आयटीआयसमोर गुरुवारी कार आणि कंटेनर यांच्यात झालेल्या अपघातामुळे काही काळ परिसरात खळबळ उडाली. कार चालकाने कंटेनरला ओव्हरटेक करण्याचा प्रयत्न करत असताना हा अपघात घडला. सुदैवाने या घटनेत कोणतीही जीवितहानी झाली नसली तरी वाहनांचे नुकसान झाले असून काही काळ वाहतुकीवर परिणाम झाला.
मिळालेल्या माहितीनुसार, जळगाव-बांभोरी रस्त्यावरील शासकीय आयटीआयसमोर कार (एमएच १९ सीयु १३६७) आणि कंटेनर (आरजे ०६ जीई ३९४१) यांच्यात अपघात झाला. कार चालकाने पुढे जाण्याच्या प्रयत्नात कंटेनरला ओव्हरटेक करण्याचा प्रयत्न केला. मात्र या दरम्यान वाहनावरील नियंत्रण बिघडल्याने अपघात घडल्याची प्राथमिक माहिती समोर आली आहे.
अपघातानंतर दोन्ही वाहने रस्त्यावर थांबल्याने काही काळ वाहतुकीचा वेग मंदावला होता. घटनेची माहिती मिळताच परिसरातील नागरिक आणि वाहनचालकांनी घटनास्थळी गर्दी केली. सुदैवाने अपघातात कोणालाही गंभीर दुखापत झाली नाही किंवा जीवितहानी झाली नाही. त्यामुळे मोठी दुर्घटना टळल्याची भावना व्यक्त केली जात आहे.
दरम्यान, अपघातानंतर कंटेनर चालकाने कार चालकाला ओव्हरटेक का केले, याबाबत जाब विचारल्याने काही काळ घटनास्थळी शाब्दिक वाद झाला. या प्रकारामुळे परिसरात गोंधळाचे वातावरण निर्माण झाले होते. उपस्थित नागरिकांनी मध्यस्थी करत परिस्थिती शांत केली.
