जळगाव-लाईव्ह ट्रेंड्स न्यूज प्रतिनिधी । पार्थ पवार यांच्या कथित जमीन व्यवहार प्रकरणावरून राज्याचे माजी महसूलमंत्री आणि भाजप नेते एकनाथ खडसे यांनी उपमुख्यमंत्री अजित पवार यांच्यावर तीव्र टीका केली असून, “या प्रकरणाची सखोल चौकशी होईपर्यंत अजित पवार यांनी मंत्रिपदाचा राजीनामा द्यावा,” अशी मोठी मागणी केली आहे. पुण्यातील कोरेगाव पार्कमधील सुमारे ४० एकर जमीन फक्त ३०० कोटी रुपयांना विकत घेतल्याचा आरोप पार्थ पवार यांच्या कंपनीवर झाला आहे. या प्रकरणामुळे राज्यात प्रचंड राजकीय खळबळ उडाली आहे.
या प्रकरणात राज्य सरकारने मोठी कारवाई करत पुण्याचे तहसीलदार सूर्यकांत येवले आणि दुय्यम निबंधक रवींद्र तारु यांना निलंबित केले आहे. तसेच चौकशी समितीची स्थापना करण्यात आली आहे. तरीही अजित पवार यांनी मौन पाळल्याचा आरोप खडसे यांनी केला आहे. “महसूल विभागातील नियमांचे उल्लंघन करून पार्थ पवार यांच्या कंपनीने शासनाच्या ताब्यातील जमीन विकत घेतली आहे. हा व्यवहार संशयास्पद असून, सरकारने तो तातडीने रद्द करावा,” अशी मागणी खडसे यांनी केली.
खडसे यांनी स्पष्ट केले की, “ही जमीन महार वतनाची आहे. अशा जमिनीच्या खरेदीसाठी महसूल आयुक्तांची परवानगी घेणे बंधनकारक असते. मात्र या प्रकरणात कोणतीही परवानगी घेतल्याचे दिसत नाही. त्यामुळे हा व्यवहार रद्द होऊ शकतो.” त्यांनी पुढे म्हटलं की, “या व्यवहारात स्टॅम्प ड्युटी माफ करण्यासाठी बनावट कागदपत्रांचा वापर झाला आहे. फक्त एक लाख रुपयांच्या भागभांडवल असलेल्या कंपनीने ३०० कोटी रुपयांचा व्यवहार कसा केला, हा मोठा प्रश्न आहे. एवढी रक्कम कुठून आली, कोणाच्या खात्यात गेली, याचा शोध घेणे गरजेचे आहे.”
खडसे यांनी अजित पवारांवर थेट निशाणा साधत म्हटलं, “हे प्रकरण अजित पवार यांच्या सुपुत्राशी संबंधित असल्याने, प्रशासनाकडून निष्पक्ष चौकशी होईल, याची शंका आहे. म्हणूनच ही चौकशी हायकोर्टाच्या न्यायाधीशांकडून व्हावी, जेणेकरून संपूर्ण सत्य बाहेर येईल.” त्यांनी पुढे स्पष्ट शब्दात म्हटलं, “जोपर्यंत चौकशी पूर्ण होत नाही, तोपर्यंत अजित पवारांनी नैतिकतेच्या आधारावर राजीनामा दिला पाहिजे.”
या प्रकरणात खडसे यांनी उपमुख्यमंत्री देवेंद्र फडणवीस यांनाही सवाल केला. “फडणवीसांनी यापूर्वी अजित पवारांवर ७० हजार कोटी रुपयांच्या सिंचन घोटाळ्याचे पुरावे दाखवले होते. आता त्याच अजित पवारांसोबत सत्तेत बसून सरकार चालवणे हे विरोधाभासी आहे,” असा टोला त्यांनी लगावला. त्यांनी मागणी केली की, “या प्रकरणाची चौकशी सर्वोच्च किंवा उच्च न्यायालयाच्या न्यायमूर्तींकडून झाली पाहिजे. अन्यथा हे प्रकरण दडपले जाईल.”
सध्या पार्थ पवारांच्या ‘अमेडिया एंटरप्रायझेस एलएलपी’ या कंपनीच्या जमीन खरेदी प्रकरणामुळे राज्याच्या राजकारणात वादंग निर्माण झाले आहे. तहसीलदारांच्या निलंबनानंतर चौकशी सुरू असली तरी, खडसे यांच्या या मागणीमुळे अजित पवारांच्या अडचणीत अधिक भर पडली आहे.
