अमेरिकेत बेकायदेशीररीत्या राहणाऱ्या भारतीयांची विमान वापसी

दिल्ली-लाईव्ह ट्रेंडस न्यूज वृत्तसेवा | अमेरिकेच्या माजी राष्ट्राध्यक्ष डोनाल्ड ट्रम्प यांच्या प्रशासनाने बेकायदा स्थलांतरितांविरोधात कठोर कारवाई सुरू केली आहे. कागदपत्र नसलेल्या स्थलांतरितांना त्यांच्या मूळ देशात परत पाठवण्याच्या मोहिमेअंतर्गत अमेरिकेत बेकायदा राहणाऱ्या भारतीय नागरिकांना भारतात पाठवले जात आहे. अशा स्थलांतरितांना घेऊन जाणारे अमेरिकेचे लष्करी विमान भारताकडे रवाना झाले असल्याची माहिती एका अधिकाऱ्याने दिली असल्याचे वृत्त इंडिया टुडेने रॉयटर्सच्या हवाल्याने दिले आहे.

नाव न सांगण्याच्या अटीवर एका अधिकाऱ्याने सांगितले की, सी-१७ विमान स्थलांतरितांना घेऊन भारताकडे रवाना झाले आहे. परंतु हे विमान किमान २४ तासांपर्यंत भारतात पोहोचणार नाही. दरम्यान, या विमानात किती भारतीय नागरिक आहेत, याबाबत कोणतीही स्पष्ट माहिती समोर आलेली नाही. डोनाल्ड ट्रम्प यांनी अमेरिकन इतिहासातील सर्वात मोठ्या हद्दपारीचे आश्वासन दिले होते. यूएस इमिग्रेशन अँड कस्टम्स एन्फोर्समेंट ने सुमारे १८,००० कागदपत्रे नसलेल्या भारतीय नागरिकांची प्रारंभिक यादी तयार केली आहे. हे स्थलांतरित परत पाठवण्याची प्रक्रिया वेगाने सुरू असल्याचे समजते.

अमेरिकेत बेकायदा स्थलांतरितांचा मुद्दा गाजत असताना भारताचे परराष्ट्र मंत्री एस. जयशंकर यांनी स्पष्ट भूमिका मांडली होती. त्यांनी सांगितले की, “अमेरिकेत कोणतेही कागदपत्रे नसलेल्या आणि बेकायदा राहणाऱ्या भारतीय नागरिकांना वैध मार्गाने परत आणण्यासाठी भारताचे दरवाजे कायमच खुले आहेत. त्याच वेळी, बेकायदा स्थलांतराला भारताचा विरोध असल्याचे त्यांनी स्पष्ट केले. “बेकायदा स्थलांतरामुळे अन्य बेकायदा कृत्यांना चालना मिळते, असे होऊ नये,” असेही जयशंकर यांनी सांगितले.

अमेरिकेत बेकायदेशीरपणे राहणाऱ्या भारतीय स्थलांतरितांना परत घेण्याबाबत अमेरिकेचे माजी राष्ट्राध्यक्ष डोनाल्ड ट्रम्प यांनी पंतप्रधान नरेंद्र मोदी योग्य ती भूमिका घेतील, असे विधान जानेवारी महिन्यात केले होते. दोन्ही नेत्यांमध्ये या संदर्भात चर्चा झाल्यानंतर ट्रम्प यांनी ही प्रतिक्रिया दिली होती.

पेंटागॉनने एल पासो, टेक्सास आणि सॅन दिएगो, कॅलिफोर्निया येथे अमेरिकन अधिकाऱ्यांनी ताब्यात घेतलेल्या ५,००० हून अधिक स्थलांतरितांना परत पाठवण्यासाठी लष्करी विमान सेवा सुरू केली आहे. आतापर्यंत, ग्वाटेमाला, पेरू आणि होंडुरास येथील स्थलांतरितांना लष्करी विमानांद्वारे त्यांच्या मूळ देशात पाठवण्यात आले आहे. अमेरिकेतील स्थलांतरित धोरणाच्या पार्श्वभूमीवर ही कठोर कारवाई होत असून, आगामी काळात आणखी स्थलांतरितांना त्यांच्या मूळ देशात परत पाठवले जाण्याची शक्यता आहे.

Protected Content