ॲपल व अँड्रॉइडमध्ये एआय क्रांती; सिरी आणि जेमिनी बनणार अधिक स्मार्ट

टेक एक्सपर्ट आणि अथेनिलचे सह-संस्थापक तुषार मेहता यांच्या मते, आगामी काळात AI वापरकर्त्यांची अनेक छोटी-मोठी कामे स्वतः हाताळणार आहे. रिमाइंडर्स सेट करणे, ईमेल्सचे उत्तर देणे, ॲप्समध्ये काम करणे किंवा ऑनलाइन सेवा वापरणे अधिक सोपे होणार आहे.

Google आपल्या जेमिनी AI ला अनेक लोकप्रिय ॲप्ससोबत जोडण्याच्या तयारीत आहे. ब्लिंकिट, झेप्टो आणि उबरसारख्या ॲप्ससोबत थेट समन्वय साधून जेमिनी वापरकर्त्यांसाठी सर्वोत्तम पर्याय सुचवू शकेल. उदाहरणार्थ, एखादी वस्तू कोणत्या ॲपवर स्वस्त किंवा जलद उपलब्ध आहे, हे AI स्वतः तुलना करून सांगू शकेल. याशिवाय ‘जेमिनी स्पार्क’ नावाचा नवीन पर्सनल AI एजंट लॉन्च होण्याची शक्यता आहे. हा एजंट ऑनलाइन बुकिंग, रिमाइंडर्स, वेळापत्रक आणि इतर डिजिटल कामे स्वयंचलित पद्धतीने पूर्ण करू शकेल.

जीमेलमध्येही मोठे बदल दिसू शकतात. नवीन AI इनबॉक्स फीचर ईमेल्सचा सारांश आपोआप तयार करेल. त्यामुळे वापरकर्त्यांना पूर्ण मेल वाचण्याऐवजी थोडक्यात माहिती मिळेल आणि त्याच ठिकाणाहून उत्तरही देता येईल. तसेच ‘जीमेल लाईव्ह’ या व्हॉइस-आधारित फीचरमुळे वापरकर्ते आवाजाद्वारे ईमेल्स व्यवस्थापित करू शकतील.

Apple देखील नवीन सिरीसह आयफोन अधिक बुद्धिमान बनवण्याच्या तयारीत आहे. ‘Write With Siri’ आणि ‘Help Me Write’ सारखी फीचर्स वापरकर्त्यांना लेखन सुधारण्यासाठी मदत करतील. सिरी मजकूर दुरुस्त करणे, उत्तम वाक्ये सुचवणे आणि टायपिंग अधिक सोपे करणे यांसारखी कामे करू शकेल. तसेच वापरकर्ते फक्त आवाजाद्वारे शॉर्टकट तयार करू शकतील. एखादे काम वारंवार करायचे असल्यास सिरी त्यासाठी आपोआप शॉर्टकट तयार करेल.

नवीन सिरी वैयक्तिक डिजिटल सहाय्यकाप्रमाणेही काम करेल. सकाळच्या बातम्या, रिमाइंडर्स, शेअर बाजाराची माहिती आणि दिवसाचे नियोजन यामध्ये सिरी मदत करू शकते. त्यामुळे स्मार्टफोनचा अनुभव अधिक वैयक्तिक आणि स्मार्ट होण्याची शक्यता आहे.

गोपनीयतेच्या दृष्टीनेही नवीन फीचर्स येऊ शकतात. चॅट हिस्ट्री ठराविक कालावधीनंतर आपोआप डिलीट करण्याची सुविधा सिरीमध्ये दिली जाऊ शकते. उदाहरणार्थ, 30 दिवसांनंतर चॅट्स ऑटो-डिलीट होतील, अशी सेटिंग वापरकर्त्यांना निवडता येईल. AI आधारित या नव्या फीचर्समुळे आगामी काळात स्मार्टफोन वापरण्याची पद्धत मोठ्या प्रमाणावर बदलण्याची शक्यता व्यक्त केली जात आहे.