सावदा-लाईव्ह ट्रेंडस न्यूज प्रतिनिधी । मुक्ताईनगर येथील प्रखर सामाजिक आणि राजकीय कार्यकर्ते अफसर खान यांची शिवसेना (शिंदे गट) अल्पसंख्यांक महाराष्ट्र प्रदेशच्या कार्याध्यक्षपदी निवड करण्यात आली आहे. या नियुक्तीमुळे पक्षाला अल्पसंख्यांक समाजात अधिक बळकटी मिळेल, असा विश्वास व्यक्त होत आहे. सावदा येथील सोहेल खान यांच्या निवासस्थानी आयोजित विशेष समारंभात त्यांचे जंगी स्वागत करण्यात आले.
अल्पसंख्यांक समाजाच्या कल्याणासाठी कार्य करणार : अफसर खान
यावेळी मनोगत व्यक्त करताना अफसर खान म्हणाले की, शिवसेना (शिंदे गट) नेहमीच अल्पसंख्यांक समाजाच्या कल्याणासाठी कार्यरत राहिली आहे. काही लोकांनी पक्षाविषयी गैरसमज पसरवण्याचा प्रयत्न केला असला तरी, शिवसेनेने मुस्लिम समाजासह सर्व अल्पसंख्यांकांच्या अनेक समस्या सोडवल्या आहेत. “समाजातील प्रत्येक प्रश्न माझ्याकडे निःसंकोचपणे आणा, मी ते सोडवण्यासाठी प्रामाणिकपणे प्रयत्न करेल,” असे आश्वासन त्यांनी दिले.
विश्वास सार्थ ठरवणार आणि पक्षाची ताकद वाढवणार
खा. चंद्रकांत पाटील आणि सईद खान यांनी आपल्यावर दाखवलेल्या विश्वासाला पात्र ठरून अल्पसंख्यांक समाजाच्या प्रश्नांवर संवेदनशीलतेने काम करणार असल्याचे अफसर खान यांनी सांगितले. शिवसेनेची ताकद वाढवण्यासाठी आपण पूर्ण क्षमतेने प्रयत्न करू, असा निर्धारही त्यांनी व्यक्त केला.
कार्यकर्त्यांकडून अभिनंदन आणि शुभेच्छा
या स्वागत समारंभाला शिवसेना जिल्हाप्रमुख समाधान महाजन, सावदा शहर प्रमुख सुरज सिंग परदेशी, तसेच सोहेल खान, अकबर खान, सादिक मिस्तरी, शेख कमरुद्दीन, अफजल खान, लतीफ तडवी, अरमान तडवी, साबीर तडवी, मोहसीन खाटीक, शेख अदनान, अमजद खाटीक, मोईन खान, शेख अल्लारखा, अकरम खान, शेख साजिद यांच्यासह अनेक कार्यकर्ते उपस्थित होते. उपस्थित सर्वांनी अफसर खान यांचे अभिनंदन करून त्यांना पुढील कार्यासाठी शुभेच्छा दिल्या.
