सावदा-लाईव्ह ट्रेंड्स न्यूज प्रतिनिधी । नाशिक विभागातील पिकांची सद्यस्थिती, शेतकऱ्यांच्या अडचणी आणि विविध प्रलंबित प्रश्नांचा आढावा घेण्यासाठी नाशिक विभागीय आयुक्त कार्यालयात महत्त्वपूर्ण बैठक पार पडली. कृषी मंत्री ना. दत्तात्रय भरणे आणि जलसंपदा मंत्री ना. गिरीशभाऊ महाजन यांच्या प्रमुख उपस्थितीत झालेल्या या बैठकीत जळगाव जिल्ह्यातील शेतकऱ्यांच्या प्रश्नांवर आमदार नंदकिशोर भागवत महाजन यांनी आक्रमकपणे लक्ष वेधले.
सन २०२५-२६ मधील केळी पीक विम्याच्या भरपाईमध्ये निर्माण झालेली तफावत दूर करून शेतकऱ्यांना योग्य व न्याय्य भरपाई मिळावी, अशी प्रमुख मागणी आमदार नंदकिशोर महाजन यांनी बैठकीत केली. केळी उत्पादक शेतकऱ्यांसाठी पीक विमा हा नुकसानाच्या काळात महत्त्वाचा आधार ठरत असल्याने विमा भरपाई निश्चित करताना शेतकऱ्यांचे प्रत्यक्ष नुकसान लक्षात घेऊन योग्य कार्यवाही करण्याची गरज त्यांनी मांडली.
जळगाव जिल्ह्यातील शेतकऱ्यांना सध्या विविध अडचणींचा सामना करावा लागत असून कृषी पंपांसाठी सुरू असलेले वीज लोडशेडिंग कमी करून सुरळीत आणि नियमित वीजपुरवठा करण्यात यावा, अशी मागणीही आमदार महाजन यांनी केली. सिंचनासाठी वीजपुरवठा नियमित राहिल्यास पिकांना आवश्यक पाणी देणे शक्य होणार असून त्याचा थेट फायदा शेतकऱ्यांना होईल, असे त्यांनी बैठकीत मांडलेल्या मुद्द्यांमधून स्पष्ट केले.
तसेच जळगाव जिल्ह्यातील सर्व तालुके दुष्काळग्रस्त घोषित करावेत, अशी मागणीही आमदार महाजन यांनी केली. पिकांची परिस्थिती आणि शेतकऱ्यांसमोरील अडचणी लक्षात घेऊन शासनाने आवश्यक त्या उपाययोजना कराव्यात, अशी अपेक्षा त्यांनी व्यक्त केली.
पिकांचे नुकसान झालेल्या भागात तातडीने पंचनामे करून नुकसानग्रस्त शेतकऱ्यांना भरपाई उपलब्ध करून द्यावी, अशी मागणीही बैठकीत करण्यात आली. नुकसानग्रस्त शेतकऱ्यांना मदत मिळण्यासाठी पंचनाम्याची प्रक्रिया वेळेत पूर्ण होणे आवश्यक असल्याचे आमदार महाजन यांनी संबंधित यंत्रणेच्या निदर्शनास आणून दिले.
सिंचनासाठी आवश्यक पाण्याची उपलब्धता, कृषी पंपांना नियमित वीजपुरवठा, पीक कर्जाची उपलब्धता तसेच विविध शासकीय योजनांचा लाभ पात्र शेतकऱ्यांपर्यंत प्रभावीपणे पोहोचविणे, या मुद्द्यांवरही त्यांनी प्रशासनाचे लक्ष वेधले. शेतकऱ्यांना योजनांचा लाभ मिळताना येणाऱ्या अडचणी दूर करून संबंधित विभागांनी समन्वयाने काम करण्याची गरज त्यांनी व्यक्त केली.
शेतकऱ्यांच्या विविध प्रश्नांकडे गांभीर्याने पाहून संबंधित विभागांनी तातडीने आवश्यक उपाययोजना कराव्यात, अशी अपेक्षा आमदार नंदकिशोर महाजन यांनी व्यक्त केली. विशेषतः केळी पीक विम्यातील तफावत दूर करून नुकसानग्रस्त शेतकऱ्यांना योग्य भरपाई मिळणे, वीजपुरवठा सुरळीत करणे आणि दुष्काळी परिस्थितीबाबत आवश्यक निर्णय घेणे या मागण्यांकडे बैठकीत त्यांनी विशेष लक्ष वेधले.
या आढावा बैठकीस मंत्री ना. गुलाबरावजी पाटील, ना. संजयजी सावकारे, ना. दादाजी भुसे यांच्यासह खासदार, आमदार, विविध पदाधिकारी तसेच संबंधित विभागांचे अधिकारी उपस्थित होते.
