चोपडा-लाईव्ह ट्रेंड्स न्यूज प्रतिनिधी । तापी नदीच्या पात्रातून विनापरवाना वाळू उत्खनन करून तिची अवैध वाहतूक करणाऱ्यांवर कारवाई करण्यासाठी गेलेल्या चोपडा ग्रामीण पोलिसांच्या पथकाला विरोध केल्याची घटना समोर आली आहे. कारवाईदरम्यान वाहन मालक, चालक व क्लिनर यांनी पोलिसांशी हुज्जत घालत धक्काबुक्की केली आणि पोलिसांनी ताब्यात घेतलेले डंपर व ट्रॅक्टर बळजबरीने पळवून नेल्याचा आरोप आहे. या प्रकरणी सात जणांविरुद्ध चोपडा ग्रामीण पोलीस ठाण्यात गुन्हा दाखल करण्यात आला आहे.
२१ सप्टेंबर २०२६ रोजी पहाटे सुमारे ४.३० वाजेच्या सुमारास निमगव्हाण ते दोंदवाडे रोडवर तापी नदीच्या पात्रातून विनापरवाना वाळूची वाहतूक सुरू असल्याची माहिती चोपडा ग्रामीण पोलिसांना मिळाली. माहिती मिळताच पोलीस अंमलदार आत्माराम रामसिंग अहिरराव हे पोलीस पथकासह घटनास्थळी दाखल झाले. घटनास्थळी पोलिसांना निळ्या रंगाच्या ट्रॅक्टर तसेच डंपरमधून वाळूची वाहतूक केली जात असल्याचे आढळून आले. पोलिसांनी संबंधित वाहने ताब्यात घेतली आणि पुढील कायदेशीर कारवाईसाठी ती चोपडा ग्रामीण पोलीस ठाण्यात जमा करण्याची प्रक्रिया सुरू केली. मात्र, वाहने ताब्यात घेतल्यानंतर त्यांचे मालक, चालक आणि क्लिनर यांनी पोलिसांच्या कारवाईला विरोध केल्याचे फिर्यादीत नमूद करण्यात आले आहे.
आरोपींनी पोलिसांशी वाद घालत शासकीय कामात अडथळा निर्माण केला. यावेळी पोलिसांना धक्काबुक्की करून त्यांच्या ताब्यात असलेले डंपर व ट्रॅक्टर बळजबरीने तेथून पळवून नेल्याचा आरोप आहे. या प्रकरणी पोलीस अंमलदार आत्माराम अहिरराव यांच्या फिर्यादीवरून चोपडा ग्रामीण पोलीस ठाण्यात सात जणांविरुद्ध गुन्हा दाखल करण्यात आला आहे.
यामध्ये दीपक शालिक पाटील (रा. पातोंडा, ता. अमळनेर, डंपर चालक), हर्षल राजेंद्र धनगर (रा. तांदलवाडी, ता. चोपडा, क्लिनर), निखिल संतोष चौधरी (रा. भोईवाडा, अमळनेर, डंपर चालक), रोहित गुलाब देसले (रा. त्रिवेणी बगीचा, अमळनेर, क्लिनर), राज जैन (रा. सुभाष चौक, अमळनेर, डंपर मालक), सुनिल भोई (रा. भोईवाडा, ता. अमळनेर, डंपर मालक) आणि देवेंद्र कोळी (रा. तांदलवाडी, ता. चोपडा) यांचा समावेश आहे. सदर प्रकरणात भारतीय न्याय संहिता (BNS) मधील कलम ३०३(२), १८९(२), ११५(२), १३२ तसेच महाराष्ट्र जमीन महसूल संहिता कलम ४८(७) आणि ४८(८) अंतर्गत गुन्हा नोंदवण्यात आला आहे. अवैध वाळू वाहतुकीसह पोलिसांच्या कारवाईला विरोध करून शासकीय कामात अडथळा आणल्याच्या आरोपांबाबत पुढील तपास सुरू आहे.
पोलीस निरीक्षक संजय सोनवणे यांच्या मार्गदर्शनाखाली चोपडा ग्रामीण पोलीस या प्रकरणाचा पुढील तपास करीत आहेत. जप्तीसाठी ताब्यात घेतलेली वाहने बळजबरीने पळवून नेल्याच्या घटनेमुळे या प्रकरणाकडे पोलिसांकडून गांभीर्याने पाहिले जात आहे. तापी नदीपात्रातून विनापरवाना वाळू उत्खनन व वाहतुकीविरोधात कारवाई करताना पोलिसांशी हुज्जत घालून जप्त वाहने पळवून नेल्याच्या आरोपावरून सात जणांवर गुन्हा दाखल झाला असून, चोपडा ग्रामीण पोलिसांकडून पुढील तपास सुरू आहे.
