मुक्ताईनगर-लाईव्ह ट्रेंड्स न्यूज प्रतिनिधी । मुक्ताईनगर शहरात प्रतिबंधित पानमसाला, सुगंधित तंबाखू आणि तंबाखूजन्य पदार्थांची सर्रास विक्री सुरू असल्याबाबत लाईव्ह ट्रेंड्स न्यूजने ७ ऑगस्ट रोजी वृत्त प्रसारित करून प्रशासनाचे लक्ष वेधले होते. या वृत्तानंतर अन्न व औषध प्रशासन, नाशिक विभागाकडून मुक्ताईनगरात धडक कारवाई करण्यात आली. ११ ऑगस्ट २०२६ रोजी रात्री करण्यात आलेल्या या कारवाईत तब्बल ६ लाख ११ हजार ३२४ रुपयांचा मुद्देमाल जप्त करण्यात आल्याची माहिती समोर आली आहे.
अन्न व औषध प्रशासनाच्या कारवाईदरम्यान ५ लाख ३६ हजार ३२४ रुपये किमतीचा प्रतिबंधित पानमसाला व तंबाखूजन्य पदार्थांचा साठा आढळून आला. यासोबत अंदाजे ७५ हजार रुपये किमतीचा मोबाईलही जप्त करण्यात आला आहे. त्यामुळे मुक्ताईनगर शहरात प्रतिबंधित तंबाखूजन्य पदार्थांचा मोठ्या प्रमाणात साठा असल्याचे या कारवाईतून समोर आले आहे. .कारवाईत पान पराग, करमचंद प्रीमियम पान मसाला, विमल पान मसाला, सागर पान मसाला, पान बहार, जाफरानी जर्दा, च्युइंग तंबाखू यासह विविध प्रतिबंधित पदार्थांचा मोठा साठा जप्त करण्यात आला. प्रतिबंधित पदार्थांची विक्री आणि साठवणुकीविरोधात प्रशासनाने केलेल्या या कारवाईमुळे शहरातील संबंधित व्यावसायिकांमध्ये खळबळ उडाली आहे
या प्रकरणात अंकित संजय सापघरे, रा. भोईवाडा, मुक्ताईनगर आणि पवन दौलतानी सेठ, रा. बुरहानपूर, मध्य प्रदेश अशी दोन नावे कागदपत्रांमध्ये नमूद असल्याची माहिती आहे. दोन्ही आरोपी सध्या फरार असून, त्यांचा शोध घेण्याची कार्यवाही सुरू असल्याचे समोर आले आहे. दरम्यान, मुक्ताईनगर शहरात प्रतिबंधित पानमसाला व तंबाखूजन्य पदार्थांच्या विक्रीबाबत यापूर्वीही तक्रारी आणि वृत्ते समोर आली होती. अशा परिस्थितीत नाशिक विभागातील अन्न व औषध प्रशासनाच्या पथकाला मुक्ताईनगरात येऊन मोठ्या प्रमाणात कारवाई करावी लागल्याने स्थानिक प्रशासनाच्या कार्यपद्धतीवर नागरिकांकडून प्रश्न उपस्थित केले जात आहेत. प्रतिबंधित पदार्थांचा एवढा मोठा साठा स्थानिक पातळीवरील यंत्रणेच्या निदर्शनास का आला नाही? या विक्रीविरोधात यापूर्वी प्रभावी कारवाई का झाली नाही? बाहेरील विभागाला येऊन कारवाई करण्याची वेळ का आली? असे अनेक प्रश्न आता नागरिकांकडून उपस्थित होत आहेत. मात्र, मुक्ताईनगर पोलिसांचा या प्रकरणातील सहभाग किंवा दुर्लक्ष सिद्ध झालेले नाही, त्यामुळे त्यांच्या भूमिकेबाबत कोणताही निष्कर्ष काढण्यापूर्वी संबंधित प्रशासनाचे अधिकृत स्पष्टीकरण आवश्यक आहे.
या कारवाईच्या पार्श्वभूमीवर लाईव्ह ट्रेंड्स न्यूजने ७ ऑगस्ट रोजी केलेल्या वृत्ताकडेही लक्ष वेधले जात आहे. वृत्त प्रसिद्ध झाल्यानंतर प्रशासनाचे लक्ष वेधले गेले आणि त्यानंतर नाशिक विभागाच्या अन्न व औषध प्रशासनाने कारवाई करत ६ लाखांहून अधिक रुपयांचा मुद्देमाल जप्त केला. त्यामुळे प्रतिबंधित तंबाखू विक्रीचा प्रश्न पुन्हा एकदा ऐरणीवर आला आहे. आता फरार असलेल्या दोन्ही आरोपींचा शोध कधी पूर्ण होणार, जप्त केलेल्या मुद्देमालासंदर्भात पुढील कायदेशीर कारवाई काय होणार आणि मुक्ताईनगर शहरातील प्रतिबंधित पानमसाला व तंबाखूजन्य पदार्थांच्या विक्रीवर कायमस्वरूपी आळा बसणार का, याकडे नागरिकांचे लक्ष लागले आहे.
