अमळनेर-लाईव्ह ट्रेंडस न्युज प्रतिनिधी । शहरातील बसस्थानक परिसरात महिलेच्या पर्समधून सुमारे १ लाख १५ हजार रुपये किमतीचे सोन्याचे व चांदीचे दागिने चोरून दिल्याची धक्कादायक घटना बुधवार ३ एप्रिल रोजी दुपारी १ वाजता उघडकीला आली आहे. या संदर्भात गुरूवार ४ एप्रिल रोजी सकाळी ११ वाजता अज्ञात चोरट्यांविरोधात अमळनेर पोलीस ठाण्यात गुन्हा दाखल करण्यात आला आहे.
या संदर्भात अधिक माहिती अशी की, शितल हितेश पाटील वय-२३ रा. पिंपळे ता. अमळनेर या महिला आपल्या परिवारासह वास्तव्याला आहे. बुधवार ३ एप्रिल रोजी दुपारी १ वाजेच्या सुमारास त्या अमळनेर बसस्थानकात आलेल्या असतांना अनोळखी दोन महिलांनी त्यांच्या पर्समधून सुमारे १ लाख १५ हजार रुपये किमतीचे सोन्याचे व चांदीचे दागिने चोरून नेले. हा प्रकार लक्षात आल्यानंतर त्यांनी सर्वत्र शोध घेतला, परंतु कोणतीही माहिती मिळाली नाही. अखेर त्यांनी दुसऱ्या दिवशी गुरुवारी ४ एप्रिल रोजी सकाळी ११ वाजता अमळनेर पोलिसात धाव घेऊन तक्रार दिली. त्यानुसार अज्ञात दोन महिलांविरोधात गुन्हा दाखल करण्यात आला आहे. पुढील तपास पोलीस निरीक्षक विकास देवरे हे करीत आहे.
