यावल-लाईव्ह ट्रेंड्स न्यूज प्रतिनिधी । तालुक्यातील आदिवासी बहुल सौखेडा सिम गावातील हारून रूबाब तडवी यांनी आपल्या अथक परिश्रम, जिद्द आणि चिकाटीच्या जोरावर महाराष्ट्र लोकसेवा आयोग (MPSC) परीक्षेत यश संपादन करत पोलीस उपनिरीक्षक (PSI) पदावर निवड मिळवली आहे. त्यांच्या या यशामुळे संपूर्ण परिसरात आनंद आणि अभिमानाचे वातावरण निर्माण झाले आहे.
हारून तडवी सध्या पुणे येथे राज्य राखीव पोलिस दल (SRPF) मध्ये कार्यरत असून, नोकरी सांभाळत त्यांनी स्पर्धा परीक्षेची तयारी केली. दिवस-रात्र मेहनत, वेळेचे योग्य नियोजन आणि “PSI होणारच” या ठाम निर्धाराच्या बळावर त्यांनी हे यश प्राप्त केले. कठोर शिस्त आणि सातत्यपूर्ण अभ्यास यामुळे त्यांनी अनेक अडचणींवर मात करत आपले स्वप्न साकार केले.
ग्रामीण भागातील मर्यादित सुविधा आणि प्रतिकूल परिस्थिती असूनही हारून यांनी खचून न जाता स्वतःचा मार्ग तयार केला. त्यांच्या या यशामुळे परिसरातील इतर तरुणांमध्येही स्पर्धा परीक्षांविषयी नवीन ऊर्जा आणि प्रेरणा निर्माण झाली आहे. “कष्टाला पर्याय नाही” हा संदेश त्यांनी आपल्या कृतीतून दिला आहे.
हारून तडवी यांच्या या यशाबद्दल गावकऱ्यांकडून, समाजबांधवांकडून, मित्रपरिवार आणि नातेवाईकांकडून अभिनंदनाचा वर्षाव होत आहे. त्यांच्या कुटुंबीयांनीही आनंद व्यक्त करत “हारूनच्या जिद्दीमुळेच हे यश शक्य झाले,” अशी भावना व्यक्त केली. गावात साजरा होणारा हा आनंदोत्सव त्यांच्या कर्तृत्वाची साक्ष देत आहे.
