जळगाव – लाईव्ह ट्रेंडस न्यूज प्रतिनिधी । जळगावहून जामनेरला जात असलेल्या दुचाकीला भरधाव कार जोरदार धडक दिल्याने दुचाकीवरील पती-पत्नी दोन्ही गंभीर जखमी झाल्याची घटना दुपारी चिंचोली गावाजवळ घडली. जखमी दाम्पत्याला जिल्हा शासकीय वैद्यकीय महाविद्यालयात उपचारार्थ दाखल करण्यात आले आहे.
सविस्तर माहिती अशी की, ‘भास्कर शालीग्राम वाणी (वय-४५) आणि त्याची पत्नी मनिषा भास्कर वाणी (वय-३८) हे जळगावाला वास्तव्याला आहे. कडधान्य विक्री करण्याचा त्यांचा व्यवसाय आहे. रविवारी १० एप्रिल रोजी जामनेरला कामासाठी दुपारी ३ वाजता भास्कर वाणी व त्यांची पत्नी हे दोघे दुचाकीने निघाले होते. जळगाव-जामनेर रस्त्यावरील चिंचोली गावाजवळील राष्ट्रीय महामार्गावरून दोघे जात असतांना समोरून भरधाव वेगाने येणाऱ्या कारने दुचाकीला जोरदार धडक दिली.
या अपघातात भास्कर वाणी व त्यांची पत्नी मनिषा वाणी हे दोघे गंभीर जखमी झाले. त्यांना चिंचोली गावातील काही तरूणांनी खासगी वाहनाने जिल्हा शासकीय वैद्यकीय महाविद्यालयात उपचारार्थ दाखल केले. याबाबत पोलीसांत कोणतीही नोंद करण्यात आलेली नव्हती.
