पॅरिस वृत्तसंस्था । जगभरात थैमान घातलेल्या कोरोनामुळे फ्रान्समध्ये एकाच दिवसांत २४ तासांमध्ये ८३३ जणांचा मृत्यू झाला. आतापर्यंत एकाच दिवसात नोंदवण्यात आलेली ही सर्वाधिक संख्या आहे. फ्रान्समध्ये करोनाच्या संसर्गाने मृत्यू झालेल्यांची संख्या ८ हजार ९११ पर्यंत पोहचली असल्याची माहिती फ्रान्सचे आरोग्य मंत्री ऑलिव्हर वेरन यांनी दिली.
करोनाच्या वाढत्या संसर्गामुळे फ्रान्समध्ये १७ मार्चपासूनच लॉकडाऊन जाहीर करण्यात आला आहे. करोनाचा संसर्ग फैलावतच आहे. फ्रान्सने आता दररोज रुग्णालयासह नर्सिंग होममधील करोनाबाधितांच्या मृतांची संख्या जाहीर करण्यास सुरुवात केली आहे. याआधी मात्र, निव्वळ रुग्णालयात होणाऱ्या मृतांची माहिती देण्यात येत होती.
वेरन यांनी सांगितले की, एकाच दिवसात मृत झालेल्या नागरिकांमधील ६०५ जणांवर रुग्णालयात उपचार सुरू होते. मागील २४ तासात जवळपास ४७८ जणांना आयसीयूमध्ये दाखल करण्यात आले आहे. करोनावर मात करण्यासाठी सर्वतोपरी प्रयत्न सुरू असल्याचे त्यांनी सांगितले. फ्रान्समध्ये करोनाबाधितांची संख्या एक लाखाजवळ पोहचली आहे.
