Home प्रशासन मुक्ताईनगर तालुक्यात अवैध वाळू उपशाला उधाण! इच्छापूर-निमखेडी परिसरात पूर्णा नदीपात्रातून सर्रास वाळू...

मुक्ताईनगर तालुक्यात अवैध वाळू उपशाला उधाण! इच्छापूर-निमखेडी परिसरात पूर्णा नदीपात्रातून सर्रास वाळू वाहतूक

0
8

मुक्ताईनगर-लाईव्ह ट्रेंड्स न्यूज प्रतिनिधी । मुक्ताईनगर तालुक्यातील इच्छापूर आणि निमखेडी परिसरात अवैध वाळू उपसा व वाहतुकीचा प्रश्न पुन्हा ऐरणीवर आला आहे. पूर्णा नदीपात्रातून दररोज मोठ्या प्रमाणावर वाळूचा उपसा केला जात असल्याची चर्चा असून, या प्रकाराकडे संबंधित प्रशासनाचे दुर्लक्ष होत असल्याचा आरोप स्थानिक नागरिकांकडून केला जात आहे. त्यामुळे परिसरातील नागरिकांमध्ये संताप व्यक्त होत असून, अवैध वाळू उपसा करणाऱ्यांविरोधात तातडीने कठोर कारवाई करण्याची मागणी जोर धरत आहे.

शासनाकडून अवैध गौण खनिज उत्खननाला आळा घालण्यासाठी विविध उपाययोजना केल्या जात आहेत. मात्र, मुक्ताईनगर तालुक्यातील इच्छापूर आणि निमखेडी परिसरात पूर्णा नदीपात्रातून वाळू उपसा आणि वाहतूक सुरू असल्याची चर्चा नागरिकांमध्ये आहे. नदीपात्रातून दररोज मोठ्या प्रमाणावर वाळू काढली जात असल्यास महसूल विभाग आणि तहसील प्रशासन याकडे नेमके कोणत्या भूमिकेतून पाहत आहे, असा सवाल उपस्थित केला जात आहे. अवैध वाळू उपशामुळे नदीपात्राच्या नैसर्गिक रचनेवर विपरीत परिणाम होण्याची शक्यता आहे. नदीपात्रातील वाळूचे अनियंत्रित उत्खनन पर्यावरणीय समतोलासाठीही धोकादायक ठरू शकते. याशिवाय शासनाच्या महसुलाचेही नुकसान होत असल्याचा मुद्दा नागरिकांकडून मांडला जात आहे. एकीकडे नियमांचे पालन करण्याचे आवाहन केले जात असताना दुसरीकडे अशा प्रकारांना आळा बसत नसल्याने प्रशासनाच्या कार्यपद्धतीवर प्रश्नचिन्ह निर्माण होत आहे.

इच्छापूर आणि निमखेडी परिसरात सुरू असल्याच्या चर्चेत असलेल्या या प्रकाराची महसूल विभाग, तहसील प्रशासन तसेच संबंधित अधिकाऱ्यांनी तातडीने प्रत्यक्ष पाहणी करावी, अशी मागणी नागरिकांकडून होत आहे. पूर्णा नदीपात्रातील वाळू उपशाची वस्तुस्थिती तपासून अवैध उत्खनन किंवा वाहतूक आढळल्यास संबंधितांवर नियमानुसार कठोर कारवाई करावी, अशी अपेक्षाही व्यक्त केली जात आहे. दरम्यान, प्रशासनाने या प्रकरणाची गांभीर्याने दखल घेऊन अवैध वाळू उपसा आणि वाहतुकीवर नियंत्रण आणण्यासाठी ठोस पावले उचलावीत, अशी मागणी जोर धरत आहे. इच्छापूर-निमखेडी परिसरातील पूर्णा नदीपात्रात सुरू असल्याच्या आरोपांची प्रशासनाकडून चौकशी होणार का आणि दोषींवर कारवाई केली जाणार का, याकडे आता संपूर्ण मुक्ताईनगर तालुक्याचे लक्ष लागले आहे.


Protected Content

Play sound