यावल-लाईव्ह ट्रेंड्स न्यूज प्रतिनिधी । राष्ट्रपिता महात्मा गांधी आणि माजी पंतप्रधान लालबहादूर शास्त्री यांच्या जयंतीनिमित्त यावल येथील जळगाव जिल्हा मराठा विद्या प्रसारक समाज संचलित कला, वाणिज्य व विज्ञान महाविद्यालयात राष्ट्रीय सेवा योजना (NSS) विभागाच्या वतीने विविध उपक्रमांचे आयोजन करण्यात आले. महाविद्यालयाचे प्राचार्य डॉ. एस. आर. गायकवाड यांच्या मार्गदर्शनाखाली झालेल्या या कार्यक्रमात गांधी-शास्त्री यांच्या विचारांना उजाळा देतानाच स्वच्छता व सामाजिक जनजागृतीचा संदेश देण्यात आला.
कार्यक्रमाच्या निमित्ताने इतिहास विभागाचे प्रमुख डॉ. संतोष जाधव यांनी प्रमुख वक्ते म्हणून उपस्थितांना मार्गदर्शन केले. आपल्या व्याख्यानातून त्यांनी महात्मा गांधी आणि लालबहादूर शास्त्री यांच्या जीवनकार्याचा आढावा घेत त्यांच्या विचारांचे महत्त्व स्पष्ट केले. सत्य, अहिंसा, साधेपणा, स्वावलंबन, देशसेवा आणि सामाजिक बांधिलकी यांसारख्या मूल्यांची आजच्या काळातील आवश्यकता त्यांनी स्वयंसेवकांच्या लक्षात आणून दिली. गांधी जयंतीच्या औचित्याने महाविद्यालय परिसरात स्वच्छता अभियानाचे आयोजन करण्यात आले. राष्ट्रीय सेवा योजना विभागाच्या स्वयंसेवकांनी उत्स्फूर्तपणे सहभाग घेत महाविद्यालयातील लेडीज रूम, प्रांगण तसेच मुख्य प्रवेशद्वार परिसराची स्वच्छता केली. स्वयंसेवकांनी श्रमदानातून स्वच्छतेचा प्रत्यक्ष संदेश देत महाविद्यालय परिसर स्वच्छ व नीटनेटका ठेवण्यासाठी योगदान दिले. यानंतर यावल गावातून भव्य स्वच्छता जागृती रॅली काढण्यात आली. रॅलीच्या माध्यमातून ग्रामस्थांमध्ये स्वच्छतेचे महत्त्व, आरोग्यविषयक काळजी आणि स्वच्छ परिसराची गरज याबाबत जनजागृती करण्यात आली. स्वच्छता ही केवळ एखाद्या दिवसापुरती मर्यादित न राहता ती दैनंदिन जीवनशैलीचा भाग व्हावी, असा संदेश या उपक्रमातून देण्यात आला.
या कार्यक्रमास राष्ट्रीय सेवा योजना कार्यक्रम अधिकारी डॉ. पी. व्ही. पावरा, सहाय्यक कार्यक्रम अधिकारी प्रा. सी. टी. वसावे, प्रा. अर्जुन गाढे, प्रा. एन. एस. जगताप, प्रा. हेमंत पाटील तसेच शिक्षकेतर कर्मचारी प्रमोद भोईटे यांची प्रमुख उपस्थिती होती. महाविद्यालयातील ७० NSS स्वयंसेवकांनी या उपक्रमात सक्रिय सहभाग नोंदवत स्वच्छता अभियान आणि जनजागृती रॅलीमध्ये मोलाचे योगदान दिले. महात्मा गांधी आणि लालबहादूर शास्त्री यांच्या जयंतीनिमित्त आयोजित या उपक्रमातून विद्यार्थ्यांमध्ये स्वच्छता, सामाजिक जबाबदारी, श्रमप्रतिष्ठा आणि राष्ट्रसेवेची भावना रुजविण्याचा प्रयत्न करण्यात आला. कार्यक्रमाच्या यशस्वी आयोजनासाठी सहभागी स्वयंसेवक, प्राध्यापक, शिक्षकेतर कर्मचारी आणि उपस्थितांचे आभार मानण्यात आले.
