पारोळा-लाईव्ह ट्रेंड्स न्यूज प्रतिनिधी । तालुक्यातील कराडी येथील जिल्हा परिषद मराठी शाळेच्या उपशिक्षिका स्मिता श्रीराम देसले यांना त्यांच्या उल्लेखनीय शैक्षणिक कार्याबद्दल ५ सप्टेंबर २०२६ रोजी जळगाव येथे ‘जिल्हा परिषद आदर्श शिक्षिका’ पुरस्काराने सन्मानित करण्यात आले. त्यांच्या या उत्तुंग यशाचे वृत्तपत्रात वृत्त वाचून अत्यंत आनंद आणि अभिमान वाटल्याने पारोळा येथील गुणग्राहक व्यक्तिमत्त्व तथा राज्य पुरस्कारप्राप्त आदर्श निवृत्त शिक्षक सदानंद धडू भावसार यांनी स्मिता देसले यांच्या निवासस्थानी प्रत्यक्ष भेट देऊन त्यांचा भावपूर्ण सत्कार केला.
या गौरवप्रसंगी भावसार सरांनी शाल, श्रीफळ, पुष्पगुच्छ आणि अभिनंदनपत्र देऊन स्मिता देसले यांचा सन्मान केला. स्मिता देसले यांनी ग्रामीण भागातील विद्यार्थ्यांच्या शैक्षणिक प्रगतीसाठी आणि त्यांच्यातील सुप्त गुणांना वाव देण्यासाठी केलेले कार्य अत्यंत कौतुकास्पद आहे. शिक्षक हा केवळ विद्यार्थ्यांना ज्ञान देणारा घटक नसून त्यांच्या संपूर्ण व्यक्तिमत्त्वाला आकार देणारा खरा मार्गदर्शक असतो, असे मत व्यक्त करत भावसार सरांनी या पुरस्कारामुळे कराडी गावासह संपूर्ण पारोळा तालुक्याची मान उंचावली असल्याचे सांगून देसले मॅडम यांना पुढील शैक्षणिक वाटचालीसाठी उदंड शुभेच्छा आणि आशीर्वाद दिले.
सदानंद धडू भावसार हे स्वतः राज्य पुरस्कारप्राप्त आदर्श शिक्षक असून निवृत्तीनंतरही शैक्षणिक व सामाजिक क्षेत्रातील गुणी व्यक्तींच्या कार्याला प्रोत्साहन देण्याचे व्रत त्यांनी अविरत सुरू ठेवले आहे. समाजातील गुणवंत आणि पुरस्कारप्राप्त व्यक्तींच्या कार्याची दखल घेऊन त्यांच्या घरी जाऊन त्यांचा गौरव करणे, कौतुकाची थाप देणे ही त्यांची विशेष ओळख बनली आहे. आजपर्यंत भावसार सरांनी तब्बल ११० गुणीजन आणि विविध पुरस्कारांनी सन्मानित व्यक्तींचा प्रत्यक्ष सत्कार केला असून, त्यांच्या या उपक्रमामुळे समाजोपयोगी कार्य करणाऱ्या व्यक्तींना मोठी प्रेरणा मिळत आहे.
एका राज्य पुरस्कारप्राप्त ज्येष्ठ आदर्श शिक्षकाकडून दुसऱ्या आदर्श शिक्षिकेचा झालेला हा आपुलकीचा गौरव शिक्षण क्षेत्रातील सकारात्मक कार्याची अत्यंत प्रेरणादायी पावती ठरला आहे. या सत्कारप्रसंगी स्मिता देसले व त्यांच्या कुटुंबीयांनी भावसार सरांनी दर्शवलेल्या या गुणग्राहक वृत्तीबद्दल आणि दिलेल्या सन्मानाबद्दल अत्यंत आनंद व्यक्त करत त्यांचे मनःपूर्वक आभार मानले.
जिल्हा परिषद आदर्श शिक्षिका पुरस्कारप्राप्त स्मिता देसले यांचा राज्य पुरस्कारप्राप्त निवृत्त शिक्षक स. ध. भावसार यांनी निवासस्थानी भेट देऊन शाल, श्रीफळ व अभिनंदनपत्र देऊन भावपूर्ण सत्कार केला.
