जळगाव-लाईव्ह ट्रेंड्स न्यूज प्रतिनिधी । जळगाव जिल्ह्यातील चिंचोली गावातील उद्योजकांसाठी महत्त्वपूर्ण असलेल्या 33 केव्ही सबस्टेशनचे उद्घाटन पालकमंत्री गुलाबराव पाटील यांच्या हस्ते करण्यात आले. या नवीन सबस्टेशनमुळे परिसरातील उद्योगांना सुरळीत आणि अधिक क्षमतेने वीजपुरवठा उपलब्ध होणार असून, स्थानिक उद्योजकांना मोठा दिलासा मिळणार आहे.
चिंचोली येथे महावितरणच्या माध्यमातून उभारण्यात आलेल्या या 33 केव्ही सबस्टेशनसाठी जिल्हा नियोजन समितीच्या माध्यमातून सुमारे साडेचार कोटी रुपयांचा निधी उपलब्ध झाला होता. या निधीतून सबस्टेशनचे काम पूर्ण करण्यात आले असून, त्याचे लोकार्पण पालकमंत्री गुलाबराव पाटील यांच्या हस्ते करण्यात आले. यावेळी पालकमंत्री गुलाबराव पाटील यांनी सांगितले की, चिंचोली परिसरातील उद्योजकांना वीज तुटवड्याचा सामना करावा लागत होता. उद्योगांच्या वाढत्या गरजा लक्षात घेऊन या सबस्टेशनची निर्मिती करण्यात आली आहे. या प्रकल्पामुळे उद्योगांना आवश्यक क्षमतेचा वीजपुरवठा मिळण्यास मदत होणार असून, नवीन उद्योगांना चालना मिळेल. भविष्यात उद्योगांसाठी विजेची मागणी वाढली आणि उपलब्ध वीज क्षमता अपुरी पडली, तर पुन्हा नवीन सबस्टेशन उभारण्याची ग्वाही पालकमंत्री गुलाबराव पाटील यांनी दिली. जिल्ह्यात औद्योगिक विकासाला चालना देण्यासाठी आवश्यक त्या सुविधा उपलब्ध करून देण्यावर शासनाचा भर असल्याचे त्यांनी स्पष्ट केले.
यावेळी वीज वितरण व्यवस्थेतील बदलांबाबतही चर्चा करण्यात आली. शासनाच्या धोरणानुसार स्मार्ट मीटर बसविण्याची प्रक्रिया सुरू होणार आहे. मात्र, काही ग्राहकांना येत असलेल्या अवाजवी वीज बिलांच्या तक्रारींकडेही शासनाने गांभीर्याने लक्ष द्यावे, अशी अपेक्षा व्यक्त करण्यात आली. नवीन 33 केव्ही सबस्टेशनमुळे चिंचोली आणि परिसरातील उद्योग, व्यापारी तसेच नागरिकांना अधिक स्थिर वीजपुरवठा मिळण्याची अपेक्षा आहे. या प्रकल्पामुळे औद्योगिक विकासाला गती मिळून रोजगाराच्या नवीन संधी निर्माण होण्यास मदत होणार असल्याचे मत व्यक्त करण्यात आले.
