जळगाव-लाईव्ह ट्रेंड्स न्यूज प्रतिनिधी । जुने जळगाव परिसरात मुसळधार पावसामुळे घडलेल्या दुर्दैवी घटनेत एका शेतकऱ्याचा बैल विजेचा शॉक लागून जागीच मृत्युमुखी पडला. नियमित शेतीकामासाठी बैलगाडी घेऊन शेतात गेलेल्या शेतकऱ्याच्या बैलाचा करंट लागून मृत्यू झाल्याने परिसरात हळहळ व्यक्त होत आहे. या घटनेमुळे शेतकऱ्यांचे मोठे आर्थिक नुकसान झाले असून वीज यंत्रणेच्या सुरक्षिततेबाबतही प्रश्न उपस्थित होत आहेत.
मिळालेल्या माहितीनुसार, जुने जळगाव येथील शेतकरी पद्माकर गणपत खडके हे बुधवारी नेहमीप्रमाणे शेतीच्या कामासाठी बैलगाडीसह आपल्या शेतात गेले होते. यावेळी परिसरात सुरू असलेल्या मुसळधार पावसामुळे शेतातील वीज खांबामध्ये विद्युत प्रवाह उतरल्याचा प्राथमिक अंदाज व्यक्त करण्यात येत आहे. त्याचदरम्यान बैलाचा संपर्क त्या भागाशी येताच त्याला जोरदार विजेचा शॉक बसला आणि तो जागीच कोसळला. घटनेनंतर परिसरातील नागरिक आणि शेतकरी घटनास्थळी धावले. मात्र बैलाचा जागीच मृत्यू झाल्याचे स्पष्ट झाले. या घटनेमुळे शेतकरी पद्माकर खडके यांच्यावर मोठे आर्थिक संकट ओढवले आहे. शेतीच्या कामासाठी बैल हा महत्त्वाचा आधार असल्याने या नुकसानीची भरपाई करणे कठीण असल्याची भावना परिसरातील शेतकऱ्यांनी व्यक्त केली. मुसळधार पावसाच्या काळात वीज वाहिन्या, खांब आणि विद्युत यंत्रणांची नियमित तपासणी करणे अत्यावश्यक असल्याचे नागरिकांनी सांगितले. अशा घटना टाळण्यासाठी महावितरणने तातडीने संबंधित ठिकाणाची पाहणी करून आवश्यक दुरुस्ती करावी तसेच दोषी तांत्रिक कारणांचा शोध घ्यावा, अशी मागणीही करण्यात येत आहे.
