यावल-लाईव्ह ट्रेंड्स न्यूज प्रतिनिधी । पत्रकारिता, सामाजिक बांधिलकी, आरोग्य जनजागृती आणि जनसेवा या क्षेत्रात उल्लेखनीय योगदान देणारे साकळी (ता. यावल, जि. जळगाव) येथील ज्येष्ठ पत्रकार मिलिंद साहेबराव जंजाळे यांची संकल्प बहुउद्देशीय संस्था, अकोला यांच्या वतीने प्रदान करण्यात येणाऱ्या राज्यस्तरीय पुरस्कारासाठी निवड करण्यात आली आहे. त्यांच्या या निवडीमुळे यावल तालुक्यासह संपूर्ण जळगाव जिल्ह्यात आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे.
संकल्प बहुउद्देशीय संस्था, अकोला यांच्या वतीने विविध सामाजिक, शैक्षणिक आणि जनहिताच्या क्षेत्रात उल्लेखनीय कार्य करणाऱ्या व्यक्तींचा दरवर्षी गौरव केला जातो. यावर्षी पत्रकारिता आणि समाजसेवा क्षेत्रातील भरीव योगदानाची दखल घेत पत्रकार मिलिंद जंजाळे यांची राज्यस्तरीय पुरस्कारासाठी निवड करण्यात आली आहे. हा पुरस्कार शेगाव येथे आयोजित भव्य पुरस्कार वितरण सोहळ्यात मान्यवरांच्या हस्ते प्रदान करण्यात येणार असून त्यांचा यावेळी विशेष सत्कारही होणार आहे. मिलिंद जंजाळे यांनी अनेक वर्षे निर्भीड, वस्तुनिष्ठ आणि जनहिताची पत्रकारिता करत समाजातील विविध प्रश्नांना वाचा फोडण्याचे काम केले आहे. ग्रामीण भागातील समस्या, सर्वसामान्य नागरिकांचे प्रश्न, आरोग्य जनजागृती, सामाजिक उपक्रम आणि लोकहिताच्या विषयांवर सातत्याने लेखणी चालवत त्यांनी पत्रकारितेत वेगळी ओळख निर्माण केली आहे. त्यांच्या सामाजिक बांधिलकीमुळे आणि निस्वार्थ सेवाभावामुळे त्यांना समाजात विशेष मानाचे स्थान प्राप्त झाले आहे.
पत्रकारितेसोबतच आरोग्यविषयक जनजागृती, सामाजिक उपक्रमांमध्ये सक्रिय सहभाग आणि जनसेवेची अखंड तळमळ याची दखल घेत संकल्प बहुउद्देशीय संस्था, अकोला यांनी हा प्रतिष्ठेचा राज्यस्तरीय पुरस्कार जाहीर केला आहे. त्यांच्या कार्यामुळे अनेक सामाजिक विषयांना न्याय मिळाला असून लोकहितासाठी केलेल्या प्रयत्नांचे विविध स्तरांतून कौतुक होत आहे. “समाजासाठी लेखणी आणि सेवेसाठी आयुष्य” हे ब्रीद जपत कार्य करणाऱ्या मिलिंद जंजाळे यांच्या या यशामुळे जळगाव जिल्ह्याच्या शिरपेचात आणखी एक मानाचा तुरा रोवला गेला आहे. त्यांच्या राज्यस्तरीय सन्मानाबद्दल पत्रकार, सामाजिक कार्यकर्ते, विविध संस्था, मित्रपरिवार आणि नागरिकांनी त्यांचे अभिनंदन करत पुढील वाटचालीस शुभेच्छा दिल्या आहेत.
