जळगाव-लाईव्ह ट्रेंड्स न्यूज प्रतिनिधी । जळगाव शहरातील मेहरुण तलाव परिसरात गावठी कट्टा घेऊन दहशत माजविण्याचा प्रयत्न करणाऱ्या एका तरुणाला एमआयडीसी पोलिसांनी सापळा रचून अटक केली आहे. पोलिसांनी आरोपीकडून गावठी कट्टा जप्त केला असून, त्याच्याविरोधात भारतीय शस्त्र अधिनियमांतर्गत गुन्हा दाखल करण्यात आला आहे.
एमआयडीसी पोलीस ठाण्याच्या हद्दीतील मेहरुण तलाव परिसरात एक इसम विनापरवाना गावठी कट्टा बाळगून फिरत असल्याची गोपनीय माहिती पोलीस उपनिरीक्षक चंद्रकांत धनके यांना मिळाली होती. त्यांनी ही माहिती पोलीस निरीक्षकांना दिल्यानंतर संशयित आरोपीवर कारवाई करण्यासाठी गुन्हे शोध पथकाची नियुक्ती करण्यात आली. पोलीस उपनिरीक्षक चंद्रकांत धनके यांच्या नेतृत्वाखाली सफौ. विजयसींग पाटील, पोलीस कर्मचारी गणेश ठाकरे, किरण पाटील, नितीन ठाकूर, रमाकांत साळुंखे आणि सुभाष साबळे यांचे पथक तयार करण्यात आले. या पथकाने तातडीने मेहरुण तलाव परिसरात जाऊन संशयिताचा शोध सुरू केला. दरम्यान, मेहरुण ट्रॅक परिसरातील सुबोनिया पक्षी घराजवळ एक इसम संशयास्पदरीत्या फिरताना पोलिसांना दिसून आला. पोलिसांनी त्याला थांबण्याचा इशारा केला असता तो पळून जाण्याच्या तयारीत होता. मात्र पोलीस कर्मचारी गणेश ठाकरे आणि रमाकांत साळुंखे यांनी त्याचा पाठलाग करून त्याला ताब्यात घेतले.
ताब्यात घेतलेल्या इसमाची चौकशी केली असता त्याने आपले नाव समीर खान जावेद खान (वय २५, व्यवसाय मजुरी, रा. बिलाल चौक, तांबापुरा, जळगाव) असे सांगितले. त्याची अंगझडती घेतली असता त्याच्याकडे लोखंडी काळ्या रंगाचा गावठी कट्टा आढळून आला.
पोलिसांनी जप्त केलेल्या गावठी कट्ट्याची किंमत अंदाजे १० हजार रुपये असून, तो मॅगझीनसह असल्याचे सांगण्यात आले आहे. सदर शस्त्र दोन पंचांच्या उपस्थितीत जप्त करण्यात आले असून आरोपी समीर खान याच्याविरोधात एमआयडीसी पोलीस ठाण्यात गुन्हा क्रमांक ५७३/२०२६ अन्वये भारतीय शस्त्र अधिनियम कलम ३/२५ प्रमाणे गुन्हा दाखल करण्यात आला आहे. या प्रकरणाचा पुढील तपास सफौ. विजयसींग पाटील करीत आहेत. शहरातील अवैध शस्त्र बाळगणाऱ्यांविरोधात पोलिसांकडून कारवाईचा वेग वाढविण्यात आला असून, नागरिकांनी अशा प्रकारची माहिती मिळाल्यास त्वरित पोलिसांना कळवावे, असे आवाहन करण्यात आले आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे आणि एमआयडीसी पोलीस ठाण्याचे पोलीस निरीक्षक बबन आव्हाड यांच्या मार्गदर्शनाखाली करण्यात आली. मेहरुण तलाव परिसरात गावठी कट्टा घेऊन फिरणाऱ्या तरुणाला एमआयडीसी पोलिसांनी अटक करून अवैध शस्त्र जप्त केले आहे. या कारवाईमुळे शहरातील गुन्हेगारी प्रवृत्तींना आळा घालण्याच्या पोलिसांच्या प्रयत्नांना बळ मिळाले आहे.
