चाळीसगाव-लाईव्ह ट्रेंड्स न्यूज प्रतिनिधी । लाचलुचपत प्रतिबंधक विभाग, नाशिक यांच्या पथकाने चाळीसगाव शहरात मोठी कारवाई करत सामाजिक वनीकरण विभागातील एका वनपालाला ७,५०० रुपयांची लाच स्वीकारताना रंगेहात अटक केली आहे. या कारवाईमुळे शासकीय यंत्रणेत खळबळ उडाली असून भ्रष्टाचाराविरोधातील कठोर भूमिका पुन्हा एकदा अधोरेखित झाली आहे.
प्राप्त माहितीनुसार, आरोपी लोकसेवक प्यारेलाल विठ्ठल महाजन (वय ५३), वनपाल, सामाजिक वनीकरण, परिक्षेत्र चाळीसगाव यांनी तक्रारदाराकडून ५०,००० रुपयांच्या बिलाच्या मंजुरीसाठी ७,५०० रुपये लाचेची मागणी केली होती. ही रक्कम एकूण बिलाच्या १५ टक्के असल्याचे तपासात निष्पन्न झाले आहे.
तक्रारदाराने मौजे तरवाडे, ता. चाळीसगाव शिवारातील आपल्या शेतात चंदन वृक्ष लागवड व संवर्धनासाठी महात्मा गांधी राष्ट्रीय ग्रामीण रोजगार हमी योजना अंतर्गत अर्ज केला होता. या योजनेअंतर्गत त्यांचा अर्ज मंजूर होऊन तीन वर्षांसाठी एकूण ४,५०,००० रुपयांचा निधी मंजूर करण्यात आला होता. याच कामाचे कुशल कामाचे बिल सादर करण्यात आले होते. सदर बिलातील ५०,००० रुपयांचे देयक काढण्यासाठी आरोपीने पंच साक्षीदारांसमक्ष २४ जून २०२६ रोजी ७,५०० रुपयांची लाच मागितली. त्यानंतर लाचलुचपत प्रतिबंधक विभागाने सापळा रचून त्याच दिवशी ही रक्कम स्वीकारताना आरोपीला रंगेहात पकडले.
ही कारवाई पोलीस निरीक्षक श्रीमती नेहा सूर्यवंशी यांच्या मार्गदर्शनाखाली पार पडली. पथकात पोलीस हवालदार विनोद चौधरी, पोलीस कॉन्स्टेबल अनिल गांगोडे आणि पोलीस शिपाई योगेश शिंदे यांचा समावेश होता. तर तपासाची जबाबदारी पोलीस निरीक्षक हेमंत नागरे (ला.प्र.वि. जळगाव) यांच्याकडे आहे. या प्रकरणाची नोंद चाळीसगाव शहर पोलीस ठाण्यात करण्यात येत असून आरोपी लोकसेवकाविरुद्ध भ्रष्टाचार प्रतिबंधक अधिनियम १९८८ च्या कलम ७ नुसार गुन्हा दाखल करण्याची प्रक्रिया सुरू आहे.
दरम्यान, लाचलुचपत प्रतिबंधक विभागाने नागरिकांना आवाहन केले आहे की, शासकीय कामकाजात कुठल्याही प्रकारची लाच मागितल्यास तात्काळ विभागाशी संपर्क साधावा आणि भ्रष्टाचाराविरोधातील मोहिमेत सहकार्य करावे. या कारवाईनंतर सामाजिक वनीकरण विभागातील कामकाजावर प्रश्नचिन्ह निर्माण झाले असून पुढील तपासात आणखी खुलासे होण्याची शक्यता व्यक्त केली जात आहे.
