सावदा, ता. रावेर-लाईव्ह ट्रेंड्स न्यूज प्रतिनिधी । जळगाव जिल्ह्यातील केळी उत्पादक शेतकऱ्यांच्या पीक विमा दाव्यांमध्ये मोठ्या प्रमाणावर विसंगती आढळून येत असल्याचा गंभीर आरोप काँग्रेसचे जिल्हाध्यक्ष धनंजय शिरीष चौधरी यांनी केला आहे. विमा कंपनीकडून लागवड क्षेत्र, नुकसानग्रस्त क्षेत्र आणि मंजूर दाव्यांमध्ये मोठी तफावत दाखवली जात असून यामुळे हजारो शेतकरी नुकसानभरपाईपासून वंचित राहण्याची भीती निर्माण झाली आहे. या अन्यायाची तातडीने दखल घेऊन प्रशासनाने योग्य ती कारवाई करावी, अन्यथा तीव्र आंदोलन उभारण्याचा इशारा त्यांनी दिला आहे.
जिल्ह्यातील अनेक शेतकऱ्यांकडून पीक विमा दाव्यांबाबत तक्रारी समोर येत आहेत. विमा दाव्यांच्या पडताळणीसाठी उपग्रह तंत्रज्ञानाचा वापर केला जात असला तरी प्रत्यक्ष शेतात केळीची लागवड असताना देखील काही ठिकाणी उपग्रह नोंदींमध्ये संबंधित क्षेत्र लागवडीखाली नसल्याचे दर्शविले जात आहे. परिणामी शेतकऱ्यांचे विमा दावे नाकारले जात असून पात्र शेतकऱ्यांना न्याय मिळत नसल्याची भावना वाढीस लागली आहे.
जळगाव जिल्हा हा देशातील प्रमुख केळी उत्पादक पट्ट्यांपैकी एक मानला जातो. हजारो शेतकऱ्यांचे अर्थकारण केळी पिकावर अवलंबून आहे. गेल्या काही वर्षांपासून वाढता उत्पादन खर्च, खतांच्या वाढलेल्या किंमती, मजुरीचा खर्च, विजेच्या समस्या आणि नैसर्गिक आपत्ती यामुळे शेतकरी आधीच आर्थिक संकटाचा सामना करत आहे. अशा परिस्थितीत पीक विमा योजनेतच त्रुटी राहिल्यास शेतकऱ्यांच्या अडचणी अधिकच वाढणार असल्याचे चौधरी यांनी नमूद केले.
यासंदर्भात जिल्हाधिकारी, जिल्हा अधीक्षक कृषी अधिकारी तसेच संबंधित विभागांनी तातडीने हस्तक्षेप करून विमा कंपनीकडून गावनिहाय, शेतकरीनिहाय आणि क्षेत्रनिहाय तपशील मागवावा, अशी मागणी करण्यात आली आहे. विमा दाव्यांची पारदर्शक फेरतपासणी करून ज्या ठिकाणी उपग्रह नोंदी आणि प्रत्यक्ष लागवड क्षेत्रामध्ये तफावत आढळून येते, त्या प्रकरणांची स्वतंत्र चौकशी करण्यात यावी. चुकीच्या पद्धतीने नाकारलेले अथवा कमी दाखवलेले दावे दुरुस्त करून शेतकऱ्यांना त्यांच्या हक्काची नुकसानभरपाई तातडीने मिळवून द्यावी, असेही त्यांनी स्पष्ट केले. दरम्यान, १ जून आणि ४ जून रोजी जिल्ह्यात झालेल्या वादळ व चक्रीवादळामुळे केळी उत्पादक शेतकऱ्यांचे मोठ्या प्रमाणावर नुकसान झाले आहे. या नैसर्गिक आपत्तीमुळे अनेक शेतकरी आर्थिक संकटात सापडले असून त्यांच्यामध्ये तीव्र नाराजी आणि असंतोषाचे वातावरण निर्माण झाले आहे. अशा वेळी विमा दाव्यांमधील विसंगती दूर करून पात्र शेतकऱ्यांना न्याय मिळवून देणे ही प्रशासनाची जबाबदारी असल्याचे चौधरी यांनी म्हटले आहे.
या गंभीर विषयावर येत्या सोमवारी जिल्हाधिकारी तसेच जिल्हा अधीक्षक कृषी अधिकारी यांची प्रत्यक्ष भेट घेऊन सविस्तर निवेदन सादर करण्यात येणार असल्याची माहितीही त्यांनी दिली. प्रशासनाने या प्रश्नाची गांभीर्याने दखल घेऊन तातडीने निर्णय घ्यावा, अशी मागणी करण्यात आली आहे. केळी उत्पादक शेतकरी हा जळगाव जिल्ह्याच्या अर्थव्यवस्थेचा कणा असून त्यांच्या घामाच्या पैशावर आणि हक्काच्या विमा दाव्यावर कोणत्याही प्रकारचा अन्याय सहन केला जाणार नाही. शेतकऱ्यांना न्याय मिळाला नाही तर काँग्रेस पक्षाच्या वतीने व्यापक आणि तीव्र आंदोलन छेडण्यात येईल, असा स्पष्ट इशारा धनंजय शिरीष चौधरी यांनी दिला आहे.
