यावल-लाईव्ह ट्रेंड्स न्यूज प्रतिनिधी । अमळनेर येथील नवलभाऊ कृषी महाविद्यालयाच्या कृषी पदवी चतुर्थ वर्षाच्या विद्यार्थ्यांनी ‘ग्रामीण कृषी जागृकता व कृषी औद्योगिक करणानुभव योजना’ अंतर्गत यावल तालुक्यातील चुंचाळे गावामध्ये एक महत्त्वपूर्ण शैक्षणिक भेट व प्रात्यक्षिक उपक्रम यशस्वीरित्या राबवला. ५ जून ६ रोजी झालेल्या या उपक्रमाचा मुख्य उद्देश भावी कृषी तज्ज्ञांना ग्रामीण भागातील प्रत्यक्ष शेतीचा अनुभव देणे आणि शेतकऱ्यांना आधुनिक तंत्रज्ञानाची ओळख करून देणे हा होता. या उपक्रमांतर्गत विद्यार्थ्यांनी थेट चुंचाळे गावातील ग्रामस्थांशी आणि बळीराजाशी संवाद साधत त्यांच्या दैनंदिन शेतीविषयक समस्या, गरजा व गावात उपलब्ध असलेल्या नैसर्गिक संसाधनाचा सखोल अभ्यास केला.
विद्यार्थ्यांनी केवळ पुस्तकी ज्ञानापुरते मर्यादित न राहता थेट शेतकऱ्यांच्या बांधावर जाऊन आधुनिक कृषी व्यवस्थापनाचे प्रत्यक्ष प्रात्यक्षिक दाखवले. यामध्ये जमिनीची सुपीकता टिकवण्यासाठी अत्यंत आवश्यक असलेले मृदा परीक्षण (Soil Testing), योग्य पीक नियोजन, रासायनिक खतांना फाटा देऊन केली जाणारी सेंद्रिय शेती, भविष्यातील पाण्याचे संकट टाळण्यासाठी जलसंवर्धनाचे विविध उपाय, पिकांवरील कीड व रोग व्यवस्थापन याविषयी सविस्तर मार्गदर्शन केले. शेतीला पूरक ठरणारे व्यवसाय जसे की पशुपालन, कुक्कुटपालन आणि बागायती शेती याविषयी देखील शेतकऱ्यांना महत्त्वपूर्ण माहिती देण्यात आली. याशिवाय, उत्पादित शेतीमालावर योग्य प्रक्रिया करून त्याचे मूल्यवर्धन कसे करावे आणि त्यातून कृषी औद्योगिक संधी कशा निर्माण कराव्यात, याबाबत तरुणांना व शेतकऱ्यांना उत्पन्न वाढीचे नवे मार्ग सुचवले.
चुंचाळे येथील ग्रामस्थांनी आणि स्थानिक शेतकऱ्यांनी कृषीच्या या तरुण विद्यार्थ्यांचे गावात उत्साहात स्वागत केले आणि त्यांना सर्व माहिती गोळा करण्यासाठी मोठे सहकार्य केले. विद्यार्थ्यांच्या या थेट मार्गदर्शनामुळे गावातील पारंपरिक शेती करणाऱ्या शेतकऱ्यांमध्ये आणि सुशिक्षित तरुणांमध्ये आधुनिक कृषी तंत्रज्ञानाविषयी एक नवी जागृकता निर्माण झाली आहे. हा स्तुत्य उपक्रम एकूण बारा आठवडे (३ महिने) सातत्याने या परिसरात राबवला जाणार असून, यादरम्यान विद्यार्थी शेतकऱ्यांच्या संपर्कात राहून त्यांना वेळोवेळी तांत्रिक मदत करणार आहेत.
हा संपूर्ण उपक्रम यशस्वी करण्यासाठी नवलभाऊ कृषी महाविद्यालयाचे प्रा. प्रो. नरेंद्र बोरसे, कार्यक्रम समन्वयक प्रो. गिरीश पाटील यांचे विद्यार्थ्यांना मोलाचे मार्गदर्शन लाभले. तसेच चुंचाळे गावचे लोकनियुक्त सरपंच नौशाद तडवी, ग्रामपंचायत सदस्य आणि तलाठी तडवी मॅडम यांनी स्थानिक पातळीवर सर्व व्यवस्था करत या उपक्रमाला मोठी मदत केली. प्रत्यक्ष शेतभेटी, प्रात्यक्षिके आणि कृषी औद्योगिक संधींची माहिती देणारा हा उपक्रम खऱ्या अर्थाने ग्रामविकासासाठी एक मोठे शैक्षणिक योगदान ठरत आहे.
