गुजरातमध्ये दोन एसटी बसची भीषण समोरासमोर धडक; ७ ठार, १७ जखमी

मिळालेल्या माहितीनुसार, बारडोली-उवा महामार्गावरील उवा गावाजवळ एक टँकर पलटी झाला होता. या टँकरला धडक टाळण्यासाठी महाराष्ट्र परिवहन मंडळाच्या एका एसटी बस चालकाने अचानक बस वळवण्याचा प्रयत्न केला. मात्र, बसवरील नियंत्रण सुटल्याने ती दुभाजक ओलांडून विरुद्ध दिशेच्या मार्गावर गेली आणि समोरून येणाऱ्या दुसऱ्या एसटी बसला जोरदार धडक दिली.

या अपघातात सहभागी झालेल्या बसचे क्रमांक MH-18 BZ-1258 आणि MH-20 BL-3390 असे असल्याची माहिती समोर आली आहे. धडक इतकी जबरदस्त होती की दोन्ही बसचे मोठे नुकसान झाले. एका बसचा पुढील भाग पूर्णपणे चेंदामेंदा झाला, तर दुसरी बस रस्त्याखाली जाऊन पलटी झाली.

पलटी झालेली बस सीएनजीवर चालणारी असल्याने धडकेनंतर इंधन गळती झाली आणि काही क्षणांतच बसने पेट घेतला. आगीने वेगाने रौद्र रूप धारण केल्याने बसमधील प्रवाशांमध्ये एकच गोंधळ उडाला. काही प्रवाशांना बाहेर पडण्याची संधी मिळाली; मात्र अनेक प्रवासी बसमध्येच अडकले. आगीच्या ज्वाळा आणि प्रवाशांच्या किंकाळ्यांमुळे परिसरात हृदयद्रावक वातावरण निर्माण झाले होते.

घटनेची माहिती मिळताच स्थानिक नागरिक मदतीसाठी धावून आले. बारडोली अग्निशमन दल, पोलीस प्रशासन आणि आपत्कालीन सेवा यंत्रणा तातडीने घटनास्थळी दाखल झाल्या. सुमारे अर्धा तास शर्थीचे प्रयत्न केल्यानंतर अग्निशमन दलाने आगीवर नियंत्रण मिळवले. त्यानंतर बचावकार्य अधिक वेगाने राबविण्यात आले.

अपघातात भाजल्यामुळे आणि गंभीर दुखापतींमुळे अनेक प्रवासी जखमी झाले आहेत. सर्व जखमींना तातडीने जवळच्या रुग्णालयात दाखल करण्यात आले असून गंभीर जखमींना पुढील उपचारासाठी सुरत येथे हलविण्यात आले आहे. डॉक्टरांचे विशेष पथक त्यांच्या प्रकृतीवर लक्ष ठेवून आहे.

या भीषण अपघातामुळे बारडोली-उवा महामार्गावरील वाहतूक काही काळ पूर्णपणे ठप्प झाली होती. पोलिसांनी वाहतूक वळवून परिस्थिती नियंत्रणात आणली. अपघाताचे नेमके कारण आणि मृतांची ओळख पटविण्याचे काम प्रशासनाकडून सुरू असून, मृतांचा आकडा वाढण्याची भीती व्यक्त केली जात आहे.