जळगाव-लाईव्ह ट्रेंड्स न्यूज प्रतिनिधी । ग्रामीण भागातील युवक, युवती आणि महिलांना कौशल्याधारित प्रशिक्षणाद्वारे रोजगार व स्वयंरोजगाराच्या संधी उपलब्ध करून देणाऱ्या ग्रामीण स्वयंरोजगार प्रशिक्षण संस्था (आरसेटी) जळगाव केंद्राला जिल्हाधिकारी रोहन घुगे यांनी सोमवारी भेट देऊन प्रशिक्षण व्यवस्थेची पाहणी केली. यावेळी त्यांनी प्रशिक्षणार्थींशी संवाद साधत स्वावलंबनासाठी कौशल्य विकासाचे महत्त्व अधोरेखित केले.
भेटीदरम्यान जिल्हाधिकारी घुगे यांनी केंद्रात सुरू असलेल्या ब्युटी पार्लर मॅनेजमेंट आणि कृषी उद्यमी प्रशिक्षण तुकड्यांना भेट दिली. प्रशिक्षणाची गुणवत्ता, उपलब्ध सुविधा आणि प्रशिक्षणार्थींना दिले जाणारे मार्गदर्शन याची त्यांनी सविस्तर माहिती घेतली. तसेच प्रशिक्षणार्थींशी संवाद साधून त्यांच्या अनुभवांबाबत जाणून घेतले.
यावेळी बोलताना जिल्हाधिकाऱ्यांनी कृषी, उद्योग आणि व्यवसाय क्षेत्रात निर्माण होत असलेल्या नव्या संधींचा लाभ घेण्याचे आवाहन केले. यशस्वी उद्योजक होण्यासाठी सातत्य, मेहनत आणि सकारात्मक दृष्टिकोन आवश्यक असल्याचे त्यांनी सांगितले. प्रशिक्षण पूर्ण झाल्यानंतर केवळ नोकरीच्या शोधात न राहता स्वतःच्या कौशल्याच्या जोरावर उद्योग-व्यवसाय उभारून आत्मनिर्भर बनावे, असेही त्यांनी प्रशिक्षणार्थींना मार्गदर्शन केले.
शासनाच्या विविध रोजगार व उद्योजकता योजनांचा लाभ घेऊन आर्थिक सक्षमीकरण साधण्यावर भर देत त्यांनी ग्रामीण भागातील युवक-युवतींनी उद्योजकतेकडे वळण्याची गरज व्यक्त केली. आरसेटीसारख्या संस्थांच्या माध्यमातून ग्रामीण भागात कौशल्य विकासाला चालना मिळत असून रोजगारनिर्मितीसाठी अशा उपक्रमांचे महत्त्व वाढत असल्याचे त्यांनी नमूद केले.
यावेळी अग्रणी जिल्हा व्यवस्थापक सुनील दोहरे, आरसेटीचे संचालक सत्यनारायण लाल दास तसेच सेंट्रल बँक ऑफ इंडियाचे वरिष्ठ व्यवस्थापक जतीन वालेचा उपस्थित होते.
ग्रामीण युवक-युवतींना कौशल्य प्रशिक्षणाद्वारे रोजगारक्षम बनविणे आणि स्वयंरोजगारासाठी प्रोत्साहन देणे हा आरसेटीचा मुख्य उद्देश असून, जिल्हाधिकाऱ्यांच्या भेटीमुळे प्रशिक्षणार्थींमध्ये नव्या उत्साहाचे वातावरण निर्माण झाले आहे.
