इफकोच्या ‘नॅनो खते शेतकरी जागृती मोहिमे’चा शुभारंभ !

या मोहिमेअंतर्गत जळगाव जिल्ह्यातील गावोगावी नॅनो खतांचा प्रचार-प्रसार करण्यात येणार असून, नॅनो डीएपी बीज प्रक्रिया प्रात्यक्षिकेही शेतकऱ्यांपर्यंत पोहोचविण्यात येणार आहेत. सध्याच्या जागतिक युद्धजन्य परिस्थितीबरोबरच ‘अलनिनो’सारख्या हवामान बदलाच्या संकटामुळे शेती अधिक शाश्वत आणि उत्पादनक्षम ठेवण्यासाठी आधुनिक तंत्रज्ञानाचा वापर आवश्यक असल्याचे यावेळी नमूद करण्यात आले.

जिल्हाधिकारी घुगे म्हणाले की, नॅनो युरिया, नॅनो डीएपी, नॅनो झिंक आणि नॅनो कॉपर यांसारखी खते कमी प्रमाणात वापरूनही अधिक परिणामकारक ठरतात. जळगाव जिल्ह्यात पारंपरिक रासायनिक खतांचा मोठ्या प्रमाणावर वापर होत असून, युरियाचा अतिरेक आणि अशास्त्रीय वापरामुळे जमिनीच्या आरोग्यावर तसेच भूगर्भातील पाण्याच्या गुणवत्तेवर परिणाम होत आहे. युरियाच्या विघटन प्रक्रियेतून निर्माण होणारे नायट्रेट घटक भूगर्भातील पाण्यात मिसळून पिण्याच्या पाण्याचे प्रदूषण वाढवत असल्याची बाबही त्यांनी अधोरेखित केली.

तसेच, युरियाच्या वापरातून अमोनिया व नायट्रस ऑक्साईडसारखे वायू वातावरणात मिसळून हवेचे प्रदूषण वाढत असल्याने पारंपरिक खतांच्या वापरावर नियंत्रण ठेवणे आवश्यक असल्याचे प्रशासनाने स्पष्ट केले. शेतकऱ्यांनी शिफारशीनुसार आणि शास्त्रीय पद्धतीने खतांचा वापर करावा, असे आवाहनही करण्यात आले.

नॅनो युरिया हे द्रवरूप खत अत्यंत सूक्ष्म कणांद्वारे पिकांना थेट उपलब्ध होत असून, पानांद्वारे शोषले जाणारे हे कण पिकांच्या गरजेनुसार कार्यरत राहतात. त्यामुळे त्याची कार्यक्षमता सुमारे ९० टक्क्यांपर्यंत असल्याचे सांगण्यात आले. याउलट पारंपरिक युरियाची कार्यक्षमता केवळ २५ ते ३० टक्क्यांपर्यंत मर्यादित राहते.

येत्या खरीप हंगामात किमान २५ टक्के पारंपरिक खतांचा वापर कमी करून नॅनो खतांचा वापर वाढवावा, असे आवाहन प्रशासनाने केले. यामुळे जमिनीचे, पाण्याचे आणि हवेचे प्रदूषण कमी होऊन शेती अधिक शाश्वत व पर्यावरणपूरक बनेल, असा विश्वास व्यक्त करण्यात आला. कार्यक्रमास कुर्बान तडवी, पद्मनाभ मस्के, तसेच जिल्हा परिषद अधिकारी आणि इफकोचे जिल्हा प्रतिनिधी संदीप रोकडे यांच्यासह अनेक मान्यवर उपस्थित होते.