वरणगाव -लाईव्ह ट्रेंड्स न्यूज प्रतिनिधी । – वरणगाव येथील ग्रामीण रुग्णालयासमोर नगराध्यक्ष सुनील काळे, उपनगराध्यक्ष अरुणाताई इंगळे आणि सर्व नगरसेवकांनी ठिय्या आंदोलन करून वैद्यकीय अधीक्षक सचिन अहिरे यांना घेराव घालून जबाब मागितला. हा निषेध अपघातात गंभीर जखमी झालेल्या सतीश बाविस्कर यांच्या मृत्यूसंबंधी आहे. बाविस्कर यांना ग्रामीण रुग्णालयात दाखल केले गेले होते, परंतु 108 रुग्णवाहिकेची उपलब्धता नसल्याने त्यांचा जीव वाचवता आला नाही.
आज सकाळी आठ वाजल्यापासून सुरू झालेल्या आंदोलनात नगराध्यक्ष सुनील काळे यांनी प्रशासनावर तीव्र निशाणा साधत रुग्णालयातील डॉक्टरांच्या अपुरी उपस्थिती, कर्मचाऱ्यांच्या भरतीतील कमतरता आणि आरोग्य सुविधांचा अभाव याबाबत लक्ष वेधले. त्यांनी सांगितले की या कारणांमुळे रुग्णालयात रुग्णांची योग्य ती काळजी घेता येत नाही आणि रुग्णांची हेळसांड सुरू आहे.
नगरसेवकांनी रुग्णालयात सुरू असलेल्या सुविधांचा अभ्यास करून प्रशासनाला तातडीने उपाययोजना करण्याची मागणी केली. या आंदोलनादरम्यान उपस्थित नागरिकांनी देखील घोषणाबाजी केली आणि प्रशासनाच्या दुर्लक्षामुळे होणाऱ्या गैरसोयीविरोधात आपला रोष व्यक्त केला.
