मुंबई-वृत्तसेवा | महाराष्ट्र ऑलिंपिक असोसिएशनच्या रिक्त असलेल्या अध्यक्षपदावर अखेर केंद्रीय नागरी विमानवाहतूक राज्यमंत्री मुरलीधर मोहोळ यांची बिनविरोध निवड करण्यात आली आहे. पुण्यातील शिवछत्रपती क्रीडा संकुल येथे पार पडलेल्या असोसिएशनच्या सर्वसाधारण सभेत हा महत्त्वपूर्ण निर्णय घेण्यात आला. माजी अध्यक्ष अजित पवार यांच्या निधनानंतर हे पद रिक्त झाले होते.
या निवडीमागे गेल्या वर्षी घडलेल्या राजकीय घडामोडींची मोठी पार्श्वभूमी आहे. अध्यक्षपदासाठी मुरलीधर मोहोळ यांनी अजित पवार यांच्या विरोधात उभे राहण्याचे संकेत दिले होते. मात्र ऐनवेळी दोन्ही नेत्यांमध्ये तडजोड झाली आणि अजित पवार अध्यक्षपदी कायम राहिले, तर मोहोळ यांची उपाध्यक्षपदी निवड झाली होती. आता पवार यांच्या निधनानंतर मोहोळ यांनी संघटनेची संपूर्ण धुरा आपल्या हाती घेतली आहे.
दरम्यान, अध्यक्षपदासाठी सुनेत्रा पवार यांचे नावही चर्चेत होते. खो-खो असोसिएशनच्या माध्यमातून त्यांनी अलीकडेच संघटनात्मक क्षेत्रात प्रवेश केल्याने त्यांच्या निवडीच्या शक्यता वर्तवण्यात येत होत्या. मात्र, पक्षातील वरिष्ठ पातळीवरील चर्चेनंतर अखेर मुरलीधर मोहोळ यांच्या नावावर शिक्कामोर्तब करण्यात आले. त्यामुळे गेल्या काही दिवसांपासून सुरू असलेल्या चर्चांना पूर्णविराम मिळाला आहे.
दरम्यान, अजित पवार यांचे 28 जानेवारी 2026 रोजी बारामती येथे भीषण विमान अपघातात निधन झाले होते. मुंबईहून बारामतीकडे जात असताना झालेल्या या दुर्घटनेत त्यांच्यासह पाच जणांचा मृत्यू झाला होता. या घटनेमुळे संपूर्ण महाराष्ट्रात शोककळा पसरली होती. त्यांच्या निधनानंतर राज्य सरकारकडून तीन दिवसांचा शासकीय दुखवटा जाहीर करण्यात आला होता आणि 29 जानेवारी रोजी बारामती येथे शासकीय इतमामात अंत्यसंस्कार पार पडले.
महाराष्ट्राच्या राजकारणात प्रभावी नेतृत्व म्हणून ओळख असलेल्या अजित पवार यांच्या निधनानंतर आता क्रीडा क्षेत्रातील या महत्त्वाच्या संघटनेची जबाबदारी मुरलीधर मोहोळ यांच्या खांद्यावर आली आहे. त्यांच्या नेतृत्वाखाली महाराष्ट्रातील क्रीडा क्षेत्राला नवी दिशा मिळण्याची अपेक्षा व्यक्त केली जात आहे.
