वनहक्क अधिनियम, २००६ अंतर्गत अनुसूचित जमाती तसेच इतर पारंपरिक वननिवासी समुदायांना त्यांच्या वनजमिनीवरील हक्क प्रदान करण्यात आले आहेत. या पार्श्वभूमीवर वनपट्टा धारक शेतकऱ्यांना शासकीय योजनांचा लाभ सुलभपणे मिळावा, यासाठी ‘फार्मर आयडी’ नोंदणी अनिवार्य करण्यात आली आहे.
या विशेष मोहिमेअंतर्गत संबंधित शेतकऱ्यांनी आपल्या जवळील नागरी सुविधा केंद्र (CSC) येथे जाऊन आवश्यक कागदपत्रांसह नोंदणी करून घ्यावी, असे आवाहन कृषी विभागाने केले आहे. विशेष म्हणजे, ही नोंदणी प्रक्रिया पूर्णपणे मोफत असून शेतकऱ्यांकडून कोणतेही शुल्क आकारले जाणार नाही.
‘फार्मर आयडी’ नोंदणी पूर्ण झाल्यानंतर शेतकऱ्यांना कृषी विभागाच्या विविध योजना, अनुदान, पीकविमा, नैसर्गिक आपत्ती मदत तसेच इतर डिजिटल कृषी सेवांचा लाभ अधिक सुलभ आणि जलदगतीने मिळणार आहे. त्यामुळे वनपट्टा धारक शेतकऱ्यांनी या मोहिमेचा लाभ घ्यावा, असे आवाहनही प्रशासनाकडून करण्यात आले आहे.
