जळगाव-लाईव्ह ट्रेंड्स न्यूज प्रतिनिधी । शासकीय कार्यालयांमध्ये कार्यरत लिपीक वर्गीय कर्मचाऱ्यांच्या कौशल्यविकासासाठी महाराष्ट्र शासनाच्या वित्त विभागांतर्गत महत्त्वपूर्ण पाऊल उचलण्यात आले आहे. विभागीय सहसंचालक, लेखा व कोषागारे, नाशिक विभाग यांच्या मार्फत १५ एप्रिल ते २५ जून २०२६ या कालावधीत लेखा विषयक विशेष प्रशिक्षणाचे आयोजन करण्यात आले असून, यामुळे कर्मचाऱ्यांच्या कामकाजात अधिक कार्यक्षमता येण्याची अपेक्षा व्यक्त केली जात आहे.
हे प्रशिक्षण एकूण ५० दिवसांचे असून, यामध्ये लेखा, वित्त व्यवस्थापन तसेच शासनाच्या विविध संगणक प्रणालींचे सखोल मार्गदर्शन दिले जाणार आहे. आधुनिक तंत्रज्ञानाचा वापर आणि डिजिटल प्रणालींची माहिती देऊन शासकीय कामकाज अधिक पारदर्शक आणि गतिमान करण्याचा उद्देश या प्रशिक्षणामागे आहे.
लिपीक वर्गीय गट ‘क’ मधील इच्छुक कर्मचाऱ्यांनी या प्रशिक्षणासाठी आवेदन करणे आवश्यक असून, आवेदन पत्र आणि शिफारस पत्र १ ते ७ एप्रिल २०२६ या कालावधीत सादर करण्याचे निर्देश देण्यात आले आहेत. संबंधित कार्यालय प्रमुखांनी पात्र कर्मचाऱ्यांची निवड करून त्यांना या प्रशिक्षणासाठी पाठविण्याचे आवाहन करण्यात आले आहे.
नाशिक विभागांतर्गत येणाऱ्या नाशिक, धुळे, जळगाव, अहिल्यानगर आणि नंदुरबार जिल्ह्यातील शासकीय कार्यालयांतील कर्मचाऱ्यांना या प्रशिक्षणाचा लाभ घेता येणार आहे. यामुळे विभागातील प्रशासनिक कामकाज अधिक सक्षम आणि प्रभावी होण्यास मदत होणार आहे.
विभागीय सहसंचालक बाबुलाल द. पाटील यांनी या प्रशिक्षणाचा लाभ जास्तीत जास्त कर्मचाऱ्यांनी घ्यावा, असे आवाहन केले आहे. शासकीय यंत्रणेत कार्यरत असलेल्या लिपीकांनी अद्ययावत ज्ञान आणि कौशल्य आत्मसात करून आपल्या कामगिरीत सुधारणा घडवून आणावी, असा संदेशही त्यांनी दिला.
