बंगळूरु-वृत्तसेवा | इंडियन प्रीमियर लीग (आयपीएल) 2026 हंगामाच्या सुरुवातीलाच एक मोठा बदल पाहायला मिळणार आहे. यंदा आयपीएलचा पारंपरिक उद्घाटन सोहळा होणार नसल्याची अधिकृत घोषणा बीसीसीआयचे सचिव देवजीत सैकिया यांनी केली आहे. त्यामुळे 28 मार्च रोजी रॉयल चॅलेंजर्स बंगळुरू (RCB) आणि सनरायझर्स हैदराबाद (SRH) यांच्यातील पहिल्या सामन्यानेच स्पर्धेची थेट सुरुवात होणार आहे.
देवजीत सैकिया यांनी दिलेल्या माहितीनुसार, गेल्या वर्षी 4 जून 2025 रोजी घडलेल्या दुर्दैवी घटनेच्या पार्श्वभूमीवर हा निर्णय घेण्यात आला आहे. त्या घटनेत आरसीबीच्या विजय जल्लोषादरम्यान बेंगळुरूमध्ये झालेल्या चेंगराचेंगरीत 11 जणांचा मृत्यू झाला होता, तर 50 हून अधिक जण जखमी झाले होते. या घटनेमुळे बीसीसीआयने यंदा कोणताही सांस्कृतिक कार्यक्रम किंवा भव्य उद्घाटन सोहळा आयोजित न करण्याचा निर्णय घेतला आहे.
सैकिया यांनी स्पष्ट केले की, जरी उद्घाटन सोहळा रद्द करण्यात आला असला तरी आयपीएल 2026 च्या अंतिम सामन्याच्या दिवशी भव्य समारोप सोहळ्याचे आयोजन करण्यात येणार आहे. 31 मे रोजी होणाऱ्या अंतिम सामन्यात प्रेक्षकांना मोठा सांस्कृतिक कार्यक्रम पाहायला मिळणार आहे.
दरम्यान, आरसीबी आणि कर्नाटक राज्य क्रिकेट संघटनेने त्या दुर्घटनेतील मृतांच्या स्मरणार्थ महत्त्वपूर्ण पावले उचलली आहेत. बेंगळुरूच्या चिन्नास्वामी स्टेडियममध्ये एक स्मारक फलक उभारण्यात येणार असून 11 जागा कायमस्वरूपी रिकाम्या ठेवण्याचा निर्णय घेण्यात आला आहे. या जागा कोणत्याही सामन्यासाठी विकल्या जाणार नाहीत. सामन्यापूर्वी पीडितांची नावे प्रदर्शित करून एक मिनिटाचे मौनही पाळले जाणार आहे.
गेल्या वर्षी आयपीएल 2025 चा उद्घाटन सोहळा कोलकात्याच्या ईडन गार्डन्सवर मोठ्या दिमाखात पार पडला होता. बॉलिवूड अभिनेता शाहरुख खानने सूत्रसंचालन केले होते, तर दिशा पाटनी, श्रेया घोषाल आणि करण औजला यांनी शानदार सादरीकरण केले होते. मात्र यंदा अशा कोणत्याही कार्यक्रमाला विराम दिला जाणार आहे.
आयपीएल 2026 साठी सध्या केवळ 20 सामन्यांचे वेळापत्रक जाहीर करण्यात आले आहे. एप्रिल-मे महिन्यात होणाऱ्या पाच राज्यांच्या विधानसभा निवडणुकांमुळे उर्वरित वेळापत्रक नंतर जाहीर होणार असल्याचे समजते. बंगाल, तामिळनाडू आणि आसाम या राज्यांमध्ये आयपीएल सामने होणार असल्याने निवडणुकांच्या पार्श्वभूमीवर नियोजनात बदल करण्यात आला आहे.
एकंदरीत, आयपीएल 2026 हा हंगाम साधेपणाने सुरू होत असला तरी भावनिक पार्श्वभूमी आणि सुरक्षिततेवर दिलेला भर यामुळे यंदाचा हंगाम वेगळ्या कारणांसाठी लक्षात राहणार आहे.
