पारोळा-लाईव्ह ट्रेंड्स न्यूज प्रतिनिधी । राज्य सरकारने जाहीर केलेली कर्जमाफी योजना शेतकऱ्यांसाठी पुरेशी आणि प्रभावी नसून ती अनेक शेतकऱ्यांची थट्टा ठरत असल्याची तीव्र नाराजी शरद जोशी प्रणित शेतकरी संघटनेचे जिल्हाध्यक्ष किशोर पाटील यांनी व्यक्त केली आहे. केवळ कर्जमाफी देण्यापेक्षा शेतकऱ्यांना कायमस्वरूपी कर्जमुक्ती देणारी व्यापक योजना राबवावी आणि त्यांच्या सातबाऱ्यावर असलेले कर्जाचे ओझे पूर्णपणे दूर करावे, अशी मागणी त्यांनी केली आहे.
सरकारने जाहीर केलेल्या कर्जमाफीबाबत प्रतिक्रिया देताना किशोर पाटील म्हणाले की, शेतकऱ्यांच्या समस्यांचे मूळ कारण लक्षात न घेता केवळ कर्जमाफीची घोषणा केली जाते. प्रत्यक्षात ही कर्जमाफी सर्व शेतकऱ्यांपर्यंत पोहोचत नाही. कर्जमाफीपेक्षा शेतकऱ्यांना कायमस्वरूपी कर्जमुक्ती देणारी योजना राबवली गेली पाहिजे. कर्जमाफी हा शब्द तात्पुरता दिलासा देणारा आहे, परंतु कर्जमुक्ती हा कायमस्वरूपी उपाय ठरू शकतो. त्यामुळे सततच्या कर्जाच्या दडपणातून शेतकऱ्यांची सुटका होईल, असे त्यांनी नमूद केले.
कर्जमाफी योजनांमध्ये लावण्यात आलेले विविध निकष आणि तांत्रिक अडचणींमुळे अनेक शेतकरी लाभापासून वंचित राहतात. कागदपत्रांची पूर्तता करताना शेतकऱ्यांना वारंवार कार्यालयांचे हेलपाटे मारावे लागतात. परिणामी, योजना जाहीर झाल्यानंतरही अनेक शेतकऱ्यांना त्याचा प्रत्यक्ष लाभ मिळत नाही. ही परिस्थिती बदलण्यासाठी अधिक सोपी आणि पारदर्शक प्रणाली लागू करण्याची गरज असल्याचेही त्यांनी स्पष्ट केले.
महाराष्ट्रात आतापर्यंत विविध सरकारांनी अनेक वेळा कर्जमाफी जाहीर केली आहे. मात्र या योजना तात्पुरता दिलासा देणाऱ्या ठरल्या असून शेतीतील वाढता उत्पादन खर्च, महागडी बियाणे, रासायनिक खते, यंत्रसामग्री आणि बाजारपेठेत मिळणारा कमी दर यामुळे शेतकऱ्यांची आर्थिक स्थिती दिवसेंदिवस कठीण होत आहे. त्यातच अनियमित हवामान, अवकाळी पाऊस आणि पिकविमा योजनांतील अडचणी यामुळे शेतकरी अधिक कर्जबाजारी होत असल्याचेही त्यांनी सांगितले.
परदेशातील काही देशांप्रमाणे शेतकऱ्यांना एकरी अनुदान देण्याची पद्धत भारतातही लागू करावी, अशी मागणी त्यांनी केली. यामुळे शेतकऱ्यांना थेट आर्थिक पाठबळ मिळेल आणि शेती अधिक टिकाऊ होण्यास मदत होईल. आधुनिक तंत्रज्ञानाचा वापर वाढवण्यासाठी सरकारने शेतकऱ्यांना आवश्यक सुविधा आणि मार्गदर्शन उपलब्ध करून द्यावे, असेही त्यांनी नमूद केले.
कर्जाच्या वाढत्या ओझ्यामुळे अनेक शेतकरी आर्थिक संकटात सापडत असून राज्यात शेतकरी आत्महत्यांचे प्रमाण चिंताजनक असल्याची बाबही त्यांनी अधोरेखित केली. त्यामुळे शेतकऱ्यांना आर्थिकदृष्ट्या सक्षम बनवणारी व्यापक कर्जमुक्ती योजना राबवून त्यांच्या उत्पादनाला योग्य बाजारभाव आणि स्थिर बाजारपेठ उपलब्ध करून देणे अत्यंत आवश्यक असल्याचे किशोर पाटील यांनी सांगितले.
