सावदा-लाईव्ह ट्रेंड्स न्यूज प्रतिनिधी । सावदा शहरातील गौसिया नगर परिसरात एका २१ वर्षीय विवाहित महिलेला पतीने मारहाण करून ‘तलाक, तलाक, तलाक’ असे तीन वेळा उच्चारत घराबाहेर काढल्याची धक्कादायक घटना समोर आली आहे. या प्रकरणी संबंधित महिलेच्या तक्रारीवरून सावदा पोलीस ठाण्यात पतीसह एकूण ११ जणांविरोधात गुन्हा दाखल करण्यात आला आहे.
मिळालेल्या माहितीनुसार, सुमारे तीन वर्षांपूर्वी पीडित तरुणीचा नदीम नजीर खान याच्यासोबत समाजाच्या रितीरिवाजांनुसार निकाह झाला होता. या दाम्पत्याला सालार नावाचा एक वर्षाचा मुलगा आहे. नदीम खान हा मालवाहतूक रिक्षा चालवून कुटुंबाचा उदरनिर्वाह करत असल्याचे तक्रारीत नमूद करण्यात आले आहे.
लग्नानंतर सदर महिला सासरच्या संयुक्त कुटुंबात राहत होती. मात्र, सासरच्या मंडळींकडून तिला वारंवार माहेरहून व्यवसायासाठी तीन लाख रुपये आणण्याचा दबाव टाकला जात असल्याचा आरोप तिने केला आहे. पैसे आणण्यास नकार दिल्यानंतर पतीकडून तिच्यावर वारंवार मारहाण, शिवीगाळ तसेच मानसिक छळ केला जात असल्याचेही तक्रारीत म्हटले आहे.
दरम्यान, रमजान महिन्यात पतीने तिला काही दिवसांसाठी माहेरी पाठवले होते. त्यानंतर ९ मार्च रोजी आधार कार्ड शोधण्याच्या कारणावरून तिला पुन्हा सावद्यातील भाड्याच्या घरात बोलावण्यात आले. दुपारी सुमारे तीन वाजता ती घरात गेल्यानंतर पतीने कोणतेही कारण नसताना तिच्यावर शिवीगाळ करत मारहाण केल्याचा आरोप आहे.
भांडणाचा आवाज ऐकून शेजारी शेख वाजिद शेख हमीद हे घरात आले असता, त्यांच्या समोरच पती नदीम खान याने ‘तलाक, तलाक, तलाक’ असे तीन वेळा उच्चारून बेकायदेशीररित्या तलाक दिल्याचे सांगितले. त्यानंतर घराला कुलूप लावून तो निघून गेल्याचेही तक्रारीत नमूद करण्यात आले आहे.
यानंतर पीडित महिलेने वडिलांना फोन करून संपूर्ण घटना सांगितली. वडील घटनास्थळी येऊन तिला माहेरी घेऊन गेले. कुटुंबीयांशी चर्चा केल्यानंतर अखेर तिने सावदा पोलीस ठाण्यात तक्रार दाखल केली.
या प्रकरणी पती नदीम नजीर खान याच्यासह सासरच्या काही सदस्यांविरोधात कारवाईची मागणी करण्यात आली असून सावदा पोलीस ठाण्यात एकूण ११ जणांविरोधात गुन्हा दाखल करण्यात आला आहे. पुढील तपास पोलीस करत आहेत.
