शेंदुर्णी-लाईव्ह ट्रेंड्स न्यूज प्रतिनिधी । नगरपंचायतीचे कामकाज पारदर्शक राहावे आणि जनतेपर्यंत सभेतील निर्णयांची खरी माहिती पोहोचावी, यासाठी शेंदुर्णी नगरपंचायतीच्या मासिक सभांमध्ये पत्रकारांना अधिकृत प्रवेश देण्यात यावा, अशी मागणी शिवसेना (उबाठा) स्वीकृत नगरसेवक संजय देविदास सूर्यवंशी यांनी केली आहे. याबाबत त्यांनी नगरपंचायतीच्या मुख्याधिकाऱ्यांना निवेदन देत प्रशासनाला स्पष्ट इशाराही दिला आहे.
नगरपंचायतीच्या प्रत्येक मासिक सभेत विविध विकासकामांबाबत निर्णय घेतले जातात, निधीचे नियोजन केले जाते तसेच नागरिकांच्या मूलभूत समस्यांवर चर्चा केली जाते. या सर्व प्रक्रियेची माहिती नागरिकांपर्यंत पोहोचविण्याचे महत्त्वपूर्ण काम पत्रकार करत असतात. मात्र पत्रकारांना सभांपासून दूर ठेवले जात असल्यास प्रशासनाच्या कामकाजावर प्रश्नचिन्ह निर्माण होण्याची शक्यता असल्याचे मत संजय सूर्यवंशी यांनी व्यक्त केले.
नगरपंचायतीचे प्रशासन जनतेच्या पैशातून चालते, त्यामुळे या कामकाजात पारदर्शकता असणे अत्यावश्यक आहे. पत्रकारांची उपस्थिती ही प्रशासनावर नैतिक जबाबदारी ठेवते आणि घेतलेले निर्णय जनतेपर्यंत पोहोचविण्यास मदत करते. त्यामुळे पत्रकारांना प्रत्येक मासिक सभेसाठी अधिकृत आमंत्रण देण्याचे आदेश तात्काळ काढावेत, अशी स्पष्ट मागणी त्यांनी केली आहे.
पत्रकारांना दूर ठेवण्याचा कोणताही प्रयत्न सहन केला जाणार नाही, असा आक्रमक इशाराही त्यांनी दिला. लोकशाही व्यवस्थेमध्ये माध्यमे ही चौथी स्तंभ मानली जातात आणि प्रशासन व जनतेमधील दुवा म्हणून काम करतात. त्यामुळे पत्रकारांच्या उपस्थितीमुळे प्रशासन अधिक जबाबदार आणि पारदर्शक राहते, असे त्यांनी नमूद केले.
शेंदुर्णी नगरपंचायतीच्या सभांमध्ये पत्रकारांना अधिकृत प्रवेश देण्याची ही मागणी आता स्थानिक पातळीवर चर्चेचा विषय ठरत असून प्रशासन यावर काय निर्णय घेते, याकडे नागरिकांचे लक्ष लागले आहे. पत्रकारांना प्रवेश मिळाल्यास नगरपंचायतीच्या कामकाजात अधिक पारदर्शकता येईल आणि नागरिकांचा प्रशासनावरील विश्वास अधिक दृढ होईल, अशी अपेक्षा व्यक्त केली जात आहे.
