जळगाव लाईव्ह ट्रेंडस न्यूज प्रतिनिधी । आगामी महानगरपालिका, जिल्हा परिषद आणि पंचायत समिती निवडणुकांच्या पार्श्वभूमीवर शिवसेना (उद्धव बाळासाहेब ठाकरे) पक्षाने जळगाव जिल्ह्यात जोरदार हालचाली सुरू केल्या आहेत. रविवार, १४ डिसेंबर रोजी हॉटेल रिगल पॅलेस येथे पक्षाची एक महत्त्वपूर्ण आढावा बैठक आणि इच्छुकांच्या मुलाखतींचा कार्यक्रम पार पडला.
या बैठकीला पक्षाचे संपर्क प्रमुख संजय सावंत यांची प्रमुख उपस्थिती होती. त्यांनी तिन्ही स्थानिक स्वराज्य संस्थांच्या निवडणुकीच्या तयारीचा सखोल आढावा घेतला. याप्रसंगी, जळगाव शहर आणि ग्रामीण भागातून निवडणूक लढण्यास इच्छुक असलेल्या उमेदवारांच्या मुलाखती घेऊन त्यांची चाचपणी करण्यात आली.
यावेळी उमेदवारी अर्ज भरण्यास इच्छुक असलेल्यांमध्ये उत्साह दिसून आला. संपर्क प्रमुख संजय सावंत यांनी सर्व इच्छुकांशी संवाद साधून त्यांची राजकीय तयारी, जनसंपर्क आणि विजयाची क्षमता तपासून पाहिली. उमेदवारांची निवड करताना पक्षाची निष्ठा आणि जनतेतील प्रतिमा याला प्राधान्य दिले जाईल, असे संकेत यावेळी देण्यात आले.
या आढावा बैठकीला पक्षाचे ज्येष्ठ नेते गुलाबराव वाघ, माजी खासदार उन्मेश पाटील, जिल्हा प्रमुख कुलभूषण पाटील, युवा प्रमुख निलेश चौधरी यांच्यासह पक्षाचे सर्व प्रमुख पदाधिकारी आणि कार्यकर्ते मोठ्या संख्येने उपस्थित होते.
या महत्त्वाच्या बैठकीमुळे ‘शिवसेना उबाठा’ पक्षाने निवडणुकीच्या रिंगणात उतरण्याची स्पष्ट तयारी दर्शवली असून, इच्छुकांच्या मुलाखती घेऊन पक्षाने लवकरात लवकर उमेदवारांची यादी निश्चित करण्याची प्रक्रिया सुरू केली आहे.
