जळगाव-लाईव्ह ट्रेंडस न्यूज प्रतिनिधी । जळगाव तालुक्यातील उमाळे गावाजवळ काल (दि. १ नोव्हेंबर) दुपारी २ वाजण्याच्या सुमारास एक अत्यंत भीषण अपघात झाला. मागून भरधाव वेगाने आलेल्या एका बसने दुचाकीला जोरदार धडक दिल्याने दुचाकीवरील एका ३० वर्षीय तरुणाचा जागीच मृत्यू झाला, तर दुसरा तरुण गंभीर जखमी झाला आहे.
योगेश रामहरी नंदे (वय ३०, रा. गेंदालाल मील, जळगाव) असे अपघातात मृत पावलेल्या तरुणाचे नाव आहे. तर, अमोल सुरेश हुजदार (वय २८, रा. हुडको, शिवाजी नगर) हा तरुण गंभीर जखमी झाला असून, त्याला तातडीने उपचारासाठी शासकीय वैद्यकीय महाविद्यालय व रुग्णालयात (GMCH) दाखल करण्यात आले आहे.
नेमका अपघात कसा झाला?
योगेश नंदे आणि अमोल हुजदार हे दोघे मित्र शनिवार, १ नोव्हेंबर रोजी दुपारी २ वाजण्याच्या सुमारास जामनेरहून आपल्या दुचाकीने जळगावकडे परत येत होते. ते जळगाव तालुक्यातील उमाळे गावाजवळ पोहोचले असता, मागून आलेल्या एका भरधाव बसने त्यांच्या दुचाकीला जोरदार धडक दिली. धडक इतकी भीषण होती की, योगेश नंदे रस्त्यावर फेकला गेला आणि त्याचा जागीच मृत्यू झाला.
कष्टकरी कुटुंबावर दुःखाचा डोंगर:
मयत योगेश नंदे हा सेंट्रींगचे काम करून कुटुंबाला आधार देत होता. विशेष म्हणजे, तो सायंकाळी आपला लहान भाऊ नागेश याला शिव तीर्थ मैदान परिसरात पाणीपुरीच्या गाडीवर मदतही करायचा. त्याच्या अपघाती निधनाने नंदे कुटुंबावर दुःखाचा डोंगर कोसळला आहे. योगेशची आई ताराबाई या केटरर्सकडे कामाला जातात, तर वडील मिळेल ते काम करून कुटुंबाचा उदरनिर्वाह चालवतात. दुसरीकडे, जखमी झालेला अमोल हुजदार हा हमालीचे काम करतो.
या अपघातामुळे उमाळे परिसरात काही काळ तणाव निर्माण झाला होता. घटनेची माहिती मिळताच पोलिसांनी तात्काळ घटनास्थळी धाव घेतली आणि पंचनामा करून मृतदेह शासकीय रुग्णालयात हलवला. बस चालकाविरुद्ध गुन्हा दाखल करण्याची प्रक्रिया सुरू असून पोलीस अधिक तपास करत आहेत.
