भावनगर-लाईव्ह ट्रेंड्स न्यूज वृत्तसेवा । पंतप्रधान नरेंद्र मोदी यांनी शनिवारी (20 सप्टेंबर) गुजरातमधील भावनगर येथे ‘समुद्र से समृद्धी’ कार्यक्रमात देशभरातील विविध विकास प्रकल्पांचे उद्घाटन व पायाभरणी करताना, भारताच्या भविष्यासाठी ‘आत्मनिर्भरतेचा मार्गच सर्वोत्तम’ असल्याचा पुनरुच्चार केला. यावेळी मोदींनी देशवासियांना स्पष्ट शब्दांत सांगितले की, “भारताचा सर्वात मोठा शत्रू कोणताही परकीय देश नाही, तर आपलेच परावलंबन आहे.”
या भव्य कार्यक्रमात एकूण ₹34,200 कोटींहून अधिक रकमेचे प्रकल्प देशभरासाठी जाहीर करण्यात आले. यापैकी ₹26,354 कोटींचे प्रकल्प गुजरातसाठी खास असून, त्यात पायाभरणी व लोकार्पण समाविष्ट होते. यामध्ये छारा बंदरावरील एचपीएलएनजी री-गॅसिफिकेशन टर्मिनल, गुजरात आयओसीएल रिफायनरीतील ॲक्रिलिक्स अँड ऑक्सो अल्कोहोल प्रकल्प, 600 मेगावॉट ‘ग्रीन शू इनिशिएटिव्ह’, 475 मेगावॉट सोलर फीडर (पीएम-कुसुम योजनेअंतर्गत), बादेली सोलर प्रकल्प, कच्छमधील धोर्डो हे सौरऊर्जेवर चालणारे पहिले गाव, तसेच भावनगर आणि जामनगर येथील शासकीय रुग्णालयांचे विस्तारकाम आणि 70 किलोमीटर राष्ट्रीय महामार्गाचे चारपदरीकरण आदी महत्त्वाचे प्रकल्प समाविष्ट आहेत.
या कार्यक्रमात मोदींनी भारताच्या विकासाचा वेग, जागतिक पातळीवरील उपस्थिती आणि तांत्रिक क्षेत्रातील वाढीव आत्मनिर्भरतेवर भर देत H-1B व्हिसा, टॅरिफ वाद यांसारख्या आंतरराष्ट्रीय प्रश्नांचा अप्रत्यक्ष उल्लेख केला. ते म्हणाले, “भारत आज कोणाचाही द्वेष करत नाही, पण जर सर्वात मोठा शत्रू असेलच तर तो म्हणजे परावलंबन. आपल्याला दुसऱ्यांवर अवलंबून राहून चालणार नाही. हे परावलंबन संपवले नाही, तर आपला स्वाभिमान आणि पुढील पिढ्यांचे भविष्य धोक्यात येईल.”
पंतप्रधानांनी ‘आत्मनिर्भर भारत’ ही संकल्पना केवळ घोषवाक्य नसून, देशाच्या शक्ती, सन्मान आणि स्थैर्याचा मुख्य आधार असल्याचे स्पष्ट केले. त्यांनी देशवासियांना आवाहन केले की, 140 कोटी लोकसंख्येच्या सामूहिक प्रयत्नातूनच भारताचे भविष्य उज्ज्वल होईल.
