मुंबई-लाईव्ह ट्रेंड्स न्यूज वृत्तसेवा। मुंबईतील आझाद मैदानावर मराठा आरक्षणाच्या मागणीसाठी पुन्हा एकदा लाट उसळली असून, आंदोलनाचे नेतृत्व करत असलेल्या मनोज जरांगे पाटील यांनी “आता आरक्षणाशिवाय माघार नाही” असा ठाम पवित्रा घेत उपोषणास प्रारंभ केला आहे. या निर्णायक टप्प्यावर बीड जिल्ह्यातील दोन आमदारांनी उपोषणस्थळी तातडीने धाव घेतली आणि चर्चा करत आपला पाठिंबा पुन्हा एकदा जाहीर केला.
गेल्या काही महिन्यांपासून मराठा समाजाच्या आरक्षणासाठी लढा देणारे मनोज जरांगे पाटील आता मुंबईच्या आझाद मैदानावर मैदानात उतरले आहेत. सकाळपासूनच हजारो मराठा बांधव मैदानात जमले असून, संपूर्ण परिसर भगव्या झेंड्यांनी न्हाल्यासारखा वाटतो आहे. यावेळी ओबीसी प्रवर्गातून मराठा समाजाला आरक्षण मिळावे, तसेच सगेसोयरेंचा अध्यादेश तत्काळ लागू करावा, अशी प्रमुख मागणी आंदोलनकर्त्यांकडून होत आहे.
मनोज जरांगे पाटील यांनी थेट रस्त्यावरच उपोषण सुरू केले असून, त्यांच्यासह अनेक आंदोलक रस्त्यावरच आंथरूण टाकून बसले आहेत. यामुळे प्रशासनाची धावपळ सुरू झाली असून, सुरक्षेचे मोठे बंदोबस्त ठेवण्यात आले आहेत. आंदोलनाची तीव्रता लक्षात घेता हे केवळ एक सामूहिक आंदोलन नसून, सरकारवर दबाव आणणारे निर्णायक पाऊल ठरत असल्याचे चित्र दिसून येत आहे.
उपोषणाला सुरूवात होताच बीड जिल्ह्यातील आमदार संदीप क्षीरसागर आणि प्रकाशदादा साळुंके हे दोन आमदार तातडीने आंदोलनस्थळी दाखल झाले. त्यांनी मनोज जरांगे पाटील यांच्याशी चर्चा केली आणि माध्यमांसमोर सरकारने यावेळी ठोस निर्णय घ्यावा, हीच वेळ असल्याचे स्पष्ट केले. यापूर्वीही या दोन्ही आमदारांनी जरांगेंच्या आंदोलनांना पाठिंबा दिला होता.
दरम्यान, नांदेडचे काँग्रेस खासदार रवींद्र चव्हाण यांनीही आंदोलनात सहभागी होण्याची घोषणा केली आहे. त्यांनी उपमुख्यमंत्री देवेंद्र फडणवीस यांना पत्र लिहून सरकारचा विलंबाचा निर्णय प्रश्नचिन्हास्पद असल्याचे म्हटले आहे. त्यांनी संविधानिक अधिकारांचा दाखला देत आरक्षणाच्या मुद्द्यावर तातडीने निर्णय घेण्याची मागणी केली आहे.
मनोज जरांगे पाटील यांच्या आंदोलनाला केवळ मुंबईतच नव्हे, तर महाराष्ट्रभरातून प्रचंड पाठिंबा मिळत आहे. नाशिक जिल्ह्यातून हजारो मराठा बांधवांनी मुंबईकडे कूच केले आहे. इगतपुरी येथील समृद्धी महामार्गावर वाहनांचा लोंढा निर्माण झाला असून, या आंदोलनाला रसद पुरवण्यासाठीही कार्यकर्ते सज्ज झाले आहेत.
