धरणगाव लाईव्ह ट्रेंडस न्यूज प्रतिनिधी । धरणगाव तालुका प्रवासी मंडळातर्फे शहरातील गुणवंत विद्यार्थ्यांचा गौरव करण्यासाठी एका विशेष समारंभाचे आयोजन करण्यात आले होते. महात्मा फुले हायस्कूल येथे झालेल्या या कार्यक्रमात इयत्ता १० वी आणि १२ वी मध्ये प्रथम व द्वितीय क्रमांक पटकावलेल्या विद्यार्थ्यांचा तसेच NEET परीक्षेत उज्ज्वल यश संपादन करणाऱ्या विद्यार्थ्यांचा सत्कार करण्यात आला. या उपक्रमामुळे विद्यार्थ्यांना पुढील वाटचालीस प्रोत्साहन मिळाले.
मान्यवरांच्या उपस्थितीत कार्यक्रम संपन्न
या कार्यक्रमाच्या अध्यक्षस्थानी माजी नगराध्यक्ष आणि महात्मा फुले हायस्कूलचे चेअरमन ज्ञानेश्वर महाजन होते. राष्ट्रीय स्वयंसेवक संघाचे तालुका संघचालक एम.एच. चौधरी यांनी प्रमुख मार्गदर्शक म्हणून विद्यार्थ्यांना मार्गदर्शन केले. मनुदेवी पेंट हाऊसचे संचालक सौरभ राजेंद्र चौधरी, महात्मा फुले हायस्कूलचे मुख्याध्यापक पवार आणि प्रवासी मंडळाचे अध्यक्ष महेंद्र कोठारी प्रमुख अतिथी म्हणून उपस्थित होते. कार्यक्रमाचे सूत्रसंचालन राजेंद्र पडोळ यांनी केले, तर एस.डब्ल्यू. पाटील यांनी प्रास्ताविक केले. प्रमुख अतिथींचा परिचय किरण वाणी यांनी करून दिला आणि आभार प्रदर्शन ॲड. हर्षल चव्हाण यांनी केले.
या गुणगौरव सोहळ्याच्या यशस्वीतेसाठी प्रवासी मंडळाचे उपाध्यक्ष रवींद्र भागवत, डॉ. मिलिंद डहाळे, हितेश पटेल, आनंद बाचपाई, ललित येवले, सुनील चौधरी, किरणसिंह परिहार, दिनकर पाटील, सुशील कोठारी, संतोष सोनवणे, डॉ. स्वप्नील पाटील, डॉ. पंकज अमृतकर, बाबा कासार, राजेश मकवाने, ॲड. हर्षल चव्हाण आणि सुधाम चौधरी यांनी विशेष प्रयत्न केले. या कार्यक्रमामुळे विद्यार्थ्यांच्या यशाला एक नवी दिशा मिळाली.
