जळगाव लाईव्ह ट्रेडींग न्यूज प्रतिनिधी । क्रिप्टो ट्रेडींग करण्याचे टास्क देवून नफा मिळवून देण्याच आमिष दाखवत सुरूवातीला नफा देवून पुन्हा गुंतवणूक करून ९ लाख १२ हजार ११४ रूपयांची ऑनलाईन फसवणूक केल्याची घटना उघडकीला आले आहे. याप्रकरणी मंगळवारी ११ फेब्रुवारी रोजी रात्री ९ वाजता जळगाव सायबर पोलीस ठाण्यात अज्ञात व्यक्तींविरोधात गुन्हा दाखल करण्यात आला आहे.
प्रगत गोपाल गाडीलोहार वय २४ रा. पाचोरा या तरूणाला ३ फेब्रुवारी रोजी ऑनलाईन व्हाटसॲप व टेलीग्रामवरून संपर्क साधून त्यांना क्रिप्टो ट्रेंडींग करण्याचे टास्क देवून जादा नफा मिळवून देण्याचे आमिष दाखविले. प्रगत यांनी सुरूवातीला गुंतविलेल्या ४०३० रूपयांवर ५ हजार ८३९ रूपयांचा परतावा दिला. यावर प्रगत यांनी विश्वास ठेवून वेळोवेळी एकुण ९ लाख १२ हजार ११४ रूपये गुंतविले. यात त्यांना कुठलाही परतावा मिळाला नाही. दरम्यान आपली फसवणूक झाल्याचे लक्षात आल्यानंतर त्यांनी मंगळवारी ११ फेब्रुवारी रोजी रात्री ९ वाजता जळगाव सायबर पोलीस ठाण्यात धाव घेवून तक्रार दिली. त्यांनी दिलेल्या तक्रारीवरून जळगाव सायबर पोलीस ठाण्यात गुन्हा दाखल करण्यात आला. पुढील तपास पोलीस निरीक्षक सतिष गोराडे हे करीत आहे.
