बारामती-वृत्तसेवा । राज्यातील राजकारणात पुन्हा एकदा मोठ्या उलथापालथीचे संकेत मिळू लागले आहेत. राष्ट्रवादी काँग्रेस शरदचंद्र पवार पक्षाचे आमदार Rohit Pawar यांनी केलेल्या एका दाव्यामुळे महाराष्ट्राच्या राजकीय वर्तुळात खळबळ उडाली आहे. एकनाथ शिंदे यांच्या नेतृत्वाखालील शिवसेनेतील तब्बल 40 आमदार भाजपच्या संपर्कात असल्याचा दावा रोहित पवार यांनी केला असून, आगामी काळात राज्यात पुन्हा एकदा मोठा राजकीय भूकंप होण्याची शक्यता व्यक्त केली जात आहे.
बारामती येथे माध्यमांशी संवाद साधताना रोहित पवार यांनी शिवसेनेतील अंतर्गत घडामोडींवर भाष्य केले. त्यांनी म्हटले की, “Eknath Shinde यांच्या पक्षातील अनेक आमदार भाजपच्या संपर्कात आहेत. काही पक्षनिष्ठ आमदार वगळता बहुतांश आमदार संपर्कात असून, 2029 च्या निवडणुकांपूर्वी सर्व चित्र स्पष्ट होईल. जवळपास 40 आमदार भाजपशी संपर्क साधत आहेत.” त्यांच्या या वक्तव्यामुळे राज्यातील राजकीय समीकरणांबाबत नव्या चर्चांना सुरुवात झाली आहे.
गेल्या काही वर्षांत महाराष्ट्राच्या राजकारणात अनेक मोठ्या राजकीय घडामोडी घडल्या आहेत. सर्वप्रथम शिवसेनेत मोठी फूट पडत एकनाथ शिंदे यांनी अनेक आमदारांसह बंड पुकारले आणि भाजपच्या पाठिंब्याने सत्ता स्थापन केली. त्यानंतर राष्ट्रवादी काँग्रेसमध्येही विभाजन झाले आणि Ajit Pawar यांनी सत्तेत सहभागी होत उपमुख्यमंत्रीपद स्वीकारले. या पार्श्वभूमीवर रोहित पवार यांच्या वक्तव्यामुळे पुन्हा एकदा सत्ताधारी गटात अस्थिरतेची चर्चा सुरू झाली आहे.
रोहित पवार यांच्या दाव्यानंतर राजकीय विश्लेषक आणि कार्यकर्त्यांमध्ये विविध तर्क-वितर्कांना उधाण आले आहे. आगामी विधानसभा निवडणुकांपूर्वी राज्यात पुन्हा मोठे पक्षांतर किंवा राजकीय समीकरणांमध्ये बदल होऊ शकतो का, असा प्रश्न आता उपस्थित केला जात आहे. विशेषतः शिंदे गटातील आमदारांच्या भवितव्याबाबत चर्चांना वेग आला आहे.
दरम्यान, रोहित पवार यांनी यावेळी खासगी विमानांच्या सुरक्षेबाबतही गंभीर मुद्दा उपस्थित केला. “दादा जाऊन चार महिने झाले. त्यांच्या अपघाताच्या तपासासाठी अधिवेशनात स्मरणपत्र द्यावे लागले. अजित पवार आणि आमची एकच इच्छा असल्यामुळे विलिनीकरणाच्या चर्चाही अंतिम टप्प्यात आल्या होत्या. मात्र दादांच्या निधनानंतर त्या चर्चा थांबल्या,” असे त्यांनी सांगितले.
यावेळी त्यांनी खासगी विमानांच्या सुरक्षेसंदर्भात कठोर कायद्याची गरज व्यक्त केली. “दादांचा अपघात खासगी विमानामुळे झाला. भविष्यात इतर कोणत्याही नेत्यासोबत अशा घटना घडू शकतात. त्यामुळे खासगी विमानांबाबत ठोस आणि कडक कायदा होणे अत्यंत आवश्यक आहे,” असे रोहित पवार यांनी नमूद केले.
